काठमाडौं । राष्ट्रियसभाको १८ सिट बाँडफाँटमा जनता समाजवादी पार्टी (जसपा) नेपालले अड्को थापेको छ । यो दलले दुई सिट मागेको छ ।

प्रवक्ता मनिष सुमनले कांग्रेस, एमाले र नेकपाले जसपाको माग सम्बोधन गर्नुपर्ने बताए ।

‘हाम्रो दुई सिट रिक्त हुँदै छ, त्यही भएर हामीले मागेका हौँ र त्यो सम्बोधन पनि गर्नुपर्छ,’ उनले नेपालवान एचडीसँग कुरा गर्दै भने, ‘अहिले बैठक सकारात्मक छ ।’

छलफलको क्रममा कांग्रेस र एमालेले समान सात सिट र नेकपाले तीन सिट लिने विषय उठेको छ । यी तीन दल जसपा नेपाललाई एक सिट दिन तयार छ । यसमा जसपा नेपालले सहमति जनाइसकेको छैन ।

राष्ट्रियसभा निर्वाचनका लागि बुधबार उम्मेदवारी दर्ता हुँदैछ । निर्वाचन भने आगामी ११ माघमा हुँदैछ ।

मतदाता प्रदेश सांसद र स्थानीय तहका प्रमुख/उपप्रमुख तथा अध्यक्ष/उपाध्यक्ष हुन् । उनीहरूको मतभार निर्वाचन आयोगले २०७८ को जनगणनालाई आधार मानेर निर्धारण गरिसकेको छ ।

प्रदेश राजधानीमा मतदानस्थल र प्रत्येक मतदानस्थलमा दुईवटा मतदान केन्द्रको व्यवस्था आयोगले गरेको छ ।