काठमाडौं । श्रम संस्कृति पार्टीका अध्यक्ष हर्क साम्पाङले सुनसरी–१ बाट प्रतिनिधिसभा निर्वाचन लड्ने घोषणा गरेका छन् ।

प्रतिनिधिसभा निर्वाचन नजिकिँदै गर्दा उनले आफू निर्वाचन लड्ने क्षेत्र घोषणा गरेका हुन् ।

धरान उपमहानगरपालिकाका प्रमुख साम्पाङले निर्वाचन लड्ने भनिएको क्षेत्रबाट २०७९ को प्रतिनिधिसभा निर्वाचनमा जनता समाजवादी पार्टी (जसपा)का अध्यक्ष अशोककुमार राई निर्वाचित भएका थिए ।

उनलाई त्यसबेला नेकपा एमालेको समर्थन थियो । उनले राष्ट्रिय स्वतन्त्र पार्टीका उम्मेदवार सरिन ख्युङ्बा तामाङलाई थोरै मतान्तरले पराजित गरेका थिए ।

सोही क्षेत्रबाट हर्कको उम्मेदवारी घोषणा भएको हो । विगतमा यो निर्वाचन क्षेत्र कम्युनिस्टको किल्लाको रूपमा चिनिएको थियो ।

पटकपटक यस क्षेत्रबाट कम्युनिस्ट नेताहरू चुनाव जितेका छन् । यसपटक साम्पाङले कम्युनिस्ट थलोमै चुनौती दिने तयारी गरेका हुन् ।

उनी निर्वाचन प्रचारका लागि देश दौडाहामा छन् । खासगरी उनले कोशीको पहाडी र तराई क्षेत्रमा आक्रमक चुनावी प्रचार गरेका छन् ।

उनले हर्कवादलाई अघि सार्दै समृद्ध र विकसित देश श्रमबाट मात्रै हुने विचार अघि सारेका छन् ।