हेर्दै हिमाल अग्लाे, कोसी घुमेर जाऊ

आऊ रमाइलाे याे, काेसी घुमेर जाऊ

कोसी प्रदेशको झापा बिर्तामोडमा ‘रश्मि गजल गुञ्‍जन’ सम्पन्‍न भएको छ । गजलकार रश्मि असफलका गजलहरू विश्‍व कीर्तिमानी सङ्गीतकार एवं गायक सन्तोष श्रेष्ठले एकल सङ्गीत र स्वरमा प्रस्तुत गरेका हुन् ।

अन्तर्राष्ट्रिय नेपाली गजल मञ्‍च र गोल्डेन क्रियसनको आयोजना तथा अनाममण्डली र सप्तक सङ्गीत विद्यालय, बिर्तामोडको सहआयोजनामा आइतबार भएको कार्यक्रममा श्रेष्ठले असफलका विविध भावका ५ वटा गजल गाएका थिए ।

कोसी प्रदेशका प्रबुद्ध व्यक्तित्व, साहित्यकार तथा सङ्गीतकर्मीको उपस्थिति रहेको कार्यक्रममा भारतको दार्जिलिङका सङ्गीत साधक जीवनप्रकाश प्रधानको पनि सहभागिता थियो ।

कार्यक्रमलाई शुभकामना दिँदै स्रष्टा विवश बलिभद्र कोइरालाले रश्मि असफल आफैँमा कुशल शब्दशिल्पी भएकी र उनका गजलमा विश्‍व कीर्तिमानी सङ्गीतकारले भरेको धून अनि दिएको गला स्वाभाविक रूपमै सुमधुर हुने बताए । उनले नेपाली गजल गायनले गति लिएकामा खुसी पनि व्यक्त गरे ।

सङ्गीतकार जीवनप्रकाश प्रधानले अहिले नेपाली गजल गायन फैलिइरहेको अवस्थामा आफूले पनि ‘मतला’ एल्बम तयार पारेको र त्यही एल्बमका लागि नेपाल आएको सुनाए ।

‘नेपाली गजल गायनको स्वर्ण दशक, वि. सं. २०८०-२०९०’का एक अभियन्ता तथा अनेगमका अध्यक्ष घनेन्द्र ओझाले गजल गायन अभियान १० वर्षभित्र सातै प्रदेशमा सञ्‍चालन गर्ने योजना अर्का अभियन्ता सङ्गीतकार/गायक सन्तोष श्रेष्ठ र आफ्नो रहेको भन्दै तर २ वर्षभित्रै ३ वटा प्रदेशमा सम्पन्न भइसकेको र अब चाँडै मधेस र लुम्बिनीमा पनि गायन गरिने सुनाए ।

अभियानअन्तर्गत नै राधा कणेल र आफ्ना शब्दमा सन्तोष श्रेष्ठकै सङ्गीत र स्वरमा ‘नसोधी’ एल्बम आइसकेको र ३ माघमा जीवनप्रकाश प्रधानको सङ्गीतमा भारतको दार्जिलिङबाट प्रकाशित राधा, रश्मि र आफ्ना शब्द रहेको ‘मतला’ एल्बम पनि सार्वजनिक हुने जानकारी दिए ।

ओझाले गजलकार असफल र सङ्गीतकार श्रेष्ठको छोटो परिचय दिँदै नारी गजलकारका एकल गजलको प्रत्यक्ष गायन कोसी प्रदेशमै पहिलो भएको बताए ।

असफल सशक्त र कुशल सर्जक भएकी भन्दै ओझाले उनलाई चाँडै गजलकृति प्रकाशनका लागि शुभकामना दिए ।

सङ्गीतकार एवं गायक श्रेष्ठ लोकबाट आधुनिक हुँदै अहिले गजल सङ्गीतमा सक्रिय रहेका भन्दै ओझाले श्रेष्ठ कुशल स्रष्टा पनि भएका बताए ।

गिनिज बुक अफ वर्ल्ड रेकर्ड्समा नाम लेखाउन सफल श्रेष्ठले गजल, कथा र उपन्यास कृतिसमेत प्रकाशन गरिसकेका जानकारी पनि ओझाले दिए ।

कार्यक्रमको अभिभावकत्व ग्रहण गरेका साहित्यकार पूर्वमुख्य सचिव एवं क्यानाडाका लागि पहिलो नेपाली राजदूत डा. भोजराज घिमिरेले नेपाली गजल गायन अभियानमा आफू पनि संलग्‍न रहेको र यस अभियानअन्तर्गत झापामा सुन्दर र भव्य कार्यक्रम भएकामा खुसी व्यक्त गर्दै गजलकार, सङ्गीतकार र अभियानलाई बधाई र शुभकामना दिए ।

स्रष्टा, सञ्‍चारकर्मी एवं समाजसेवी खगिन्द्रा खुसीको कुशल संयोजन र सञ्चालनमा कार्यक्रम रोचक बनेको थियो ।