जनकपुर । मधेस प्रदेशका मुख्यमन्त्री कृष्णप्रसाद यादवले सुरक्षा चुनौतीका बीच आगामी निर्वाचनलाई सफल बनाउनु पर्ने बताएका छन् । बुधवार मधेस प्रदेशको राजधानी जनकपुरमा आयोजित प्रदेशस्तरीय सुरक्षा गोष्ठीमा उनले यस्तो बताएका हुन् ।

उनले जेन–जी आन्दोलनमा लुटिएका हतियार, जेलबाट भागेका कैदीहरु बाहिर रहेको, प्रहरीका आवश्यक सामाग्रीहरु नभएको अवस्थामा हुन लागेको निर्वाचनले सुरक्षा चुनौती खडा गरेको बताए । नागरिकमा भयरहित भएर मतदान गर्ने वातावरण बनाउन जरुरी रहेको उनको भनाई छ । उनले हालै साम्प्रदायिक विवाद, जातीय तथा धार्मिक विवाद पनि भएकोले त्यसतर्फ पनि सचेत हुनुपर्ने बताए ।

उनले भने, ‘धेरै लुटिएका हतियार बाहिर छन् । प्रहरीका लजिष्टिकहरु पनि धेरै नष्ट भएका छन् । सवारीसाधान देखि लिएर हतियारसम्म प्रहरीसंग छैनन् । हामी जनता निर्वाचनमा कसरी निर्भय भएर गएर मतदान गछौँ, त्यसमा हामी चिन्तित छौँ । जेल तोडेर भागेका अपराधीहरु पनि बाहिर छन् । कसैको दाउ होला, यही निर्वाचनलाई ताकेर फेरि आफ्नो कुनै रिसिबी साँधौ भन्ने पनि होला । यस्ता परिस्थितिबाट अगाडि बढेर हामी निर्वाचनको मुखमा आईपुगेका छौँ । यो हाम्रो लागि ठुलो चुनौती छ । वीचवीचमा पनि धेरै कुराहरु भइरहको छ, विगतमा दिनमा साम्प्रदायिक विवादहरु पनि हामी देखिरहेका छौँ । जातीय विवादहरु पनि देखिरहेका छौँ । राजनीतिक दलहरुका विरोध प्रर्दशन पनि भईरहेका छन् । धेरै कुराहरु छन्, यसमा हामीले अगाडिको दिनमा निर्वाचनलाई सफल बनाउनको लागि सचेत भएर लाग्नु पर्छ ।’

उनले प्रहरीलाई सीमा क्षेत्रमा हुने लागुऔषध कारोबारलाई नियन्त्रण गर्न पनि आग्रह गरे । दैनिक उपभोग्य सामग्री ल्याउने नागरिकलाई पक्राउ गर्नुको सट्टामा लागुऔषधको कारोबार गर्नेलाई पक्राउ गर्नमा बढि ध्यान दिनुपर्ने उनले बताए । उनले संघीय सरकारले प्रहरी समायोजन नगर्दा पनि धेरै समस्या भएको गुनासो गरे ।