झापा । प्रतिनिधिसभा निर्वाचन नजिकिँदै जाँदा झापा क्षेत्र नम्बर–५ मा राजनीतिक सरगर्मी तीव्र बनेको छ । जेनजी आन्दोलनपछि पहिलो पटक नेकपा एमालेका अध्यक्ष केपी शर्मा ओली गृह जिल्ला झापा पुगेका छन् भने राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) पनि आजै झापा पुग्ने तयारीमा छन् । एमाले अध्यक्ष ओली आज केहीबेरअघि हवाइमार्ग हुँदै भद्रपुरस्थित चन्द्रगढी विमानस्थल पुगेका हुन् । विमानस्थलमा उनलाई नेता–कार्यकर्ताले भव्य स्वागत गरेका छन् । त्यहाँबाट उनी विर्तामोड हुँदै दमकतर्फ प्रस्थान गरेका छन् । ओली आजदेखि दमकस्थित होटलमा बस्ने कार्यक्रम रहेको एमाले झापाले जनाएको छ ।

जेनजी आन्दोलनपछि लामो समय स्थान हद तोकिएका ओली पुस २१ गते स्थान हद फुकुवा भएपछि पहिलो पटक झापा आएका हुन् । यसअघि गत भदौ २३ र २४ गते भएको जेनजी आन्दोलनपछि उनी लामो समयसम्म गृह जिल्ला आउन सकेका थिएनन् । झापा आगमनलाई आगामी निर्वाचनसँग जोडेर हेरिएको छ, किनकि ओली फागुन २१ गते हुने प्रतिनिधिसभा निर्वाचनमा झापा–५ बाट उम्मेदवार बन्दै छन् । एमाले झापाका अध्यक्ष प्रेम गिरीका अनुसार ओलीले आज दिउँसो २ बजे दमकस्थित होटल कामाक्षमा पत्रकार सम्मेलन गर्ने तयारी छ । माघ ६ गते मनोनयन दर्ताको तालिका रहेकाले निर्वाचन आचारसंहितालाई ध्यानमा राख्दै सीमित व्यक्तिको उपस्थितिमा मनोनयन गरिने र त्यसपछि मात्र विस्तृत चुनावी रणनीति तय गरिने जनाइएको छ ।

विमानस्थलमा संक्षिप्त प्रतिक्रिया दिँदै ओलीले सरकारले अझै पूर्ण रूपमा चुनावी वातावरण बनाउन नसकेको टिप्पणी गरेका छन् । उनले मतदातामा त्रास, डर–धम्की तथा सामाजिक सञ्जालको दुरुपयोगका कारण अपेक्षित चुनावी माहोल नबनेको बताए । यद्यपि, उनले एमाले निर्वाचनमा जान पूर्ण रूपमा तयार रहेको स्पष्ट पारे । उता, ओलीकै निर्वाचन क्षेत्र झापा–५ बाट उम्मेदवारी दिने तयारीमा रहेका बालेन्द्र शाह पनि आज साँझ दमक आइपुग्ने कार्यक्रम छ । काठमाडौँ महानगरपालिकाको मेयर पदबाट राजीनामा दिएका बालेन आज मधेस प्रदेशको जनकपुरधाममा आयोजित रास्वपाको सभालाई सम्बोधन गरेपछि झापा प्रस्थान गर्नेछन् ।

रास्वपाका अनुसार शाह जनकपुरबाट सडक मार्ग हुँदै सुनसरी, मोरङ र झापाका विभिन्न स्थानमा समर्थकहरूसँग भेट्दै दमक आउने छन् । इटहरीदेखि नै समर्थकहरूको ¥यालीसहितको स्वागत कार्यक्रम राखिएको छ । यसक्रममा ठूलो भीड जुट्ने अनुमान गरिएको छ र उनी राति करिब ९ देखि १० बजेको बीचमा दमक पुग्ने सम्भावना छ । समर्थकहरूको अत्यधिक भीड व्यवस्थापन चुनौतीपूर्ण हुन सक्ने भन्दै बालेन कहाँ बस्ने भन्ने विवरण सार्वजनिक गरिएको छैन ।

आज साँझ भने उनले औपचारिक भेटघाटका कार्यक्रम नराखेको सचिवालय स्रोतले जनाएको छ । भोलि मङ्गलबार उनले निर्वाचन अधिकृतको कार्यालय पुगेर मनोनयन दर्ता गर्नेछन् । आज निर्वाचन अधिकृतको कार्यालयले सर्वदलीय छलफल बोलाएको छ, जसमा उम्मेदवारी दर्ताको समयतालिका तय गरिनेछ । ओली र बालेन दुवैको एकै दिन झापा आगमनसँगै झापा–५ को चुनावी प्रतिष्पर्धा थप रोचक बन्ने संकेत देखिएको छ । जेनजी आन्दोलनपछिको राजनीतिक पुनरागमन र वैकल्पिक राजनीतिका दाबीबीचको यो भिडन्तले राष्ट्रिय राजनीति समेत तात्ने अनुमान गरिएको छ ।