काठमाडौं । संयुक्त राष्ट्रसंघका महासचिव एन्टोनियो गुटेरेसले विश्व संगठन अहिले ठूलो आर्थिक संकटमा परेको चेतावनी दिएका छन्।

उनले सबै सदस्य राष्ट्रलाई आफ्नो बक्यौता रकम छिटो बुझाउन अनुरोध गरेका छन्। उनले भनेका छन् कि यदि यस्तो भएन भने जुलाईसम्म संस्था चलाउन समस्या हुन सक्छ।

गुटेरेसका अनुसार केही देशहरूले आफ्नो अनिवार्य योगदान ढिलो बुझाइरहेका छन् वा पुरा बुझाएका छैनन्। यही कारण राष्ट्रसंघले नयाँ कर्मचारी नबढाउने र खर्च घटाउने निर्णय गर्नुपरेको छ।

उनले भने, “सबै सदस्य राष्ट्रहरूले आफ्नो जिम्मेवारी अनुसार भुक्तानी गर्नुपर्छ, नत्र हामीले आर्थिक नियममा ठूलो परिवर्तन गर्नुपर्छ।”

संयुक्त राष्ट्रको सुरक्षा परिषद्का स्थायी सदस्यहरू अमेरिका, रुस र चीनबीच बढ्दो विवादले पनि संस्था काम गर्न गाह्रो बनाएको छ।

अमेरिकी राष्ट्रपति ट्रम्पले सुरु गरेको ‘बोर्ड अफ पिस’लाई आलोचकहरूले राष्ट्रसंघको प्रतिस्पर्धी संस्था भन्न थालेका छन्।

संयुक्त राष्ट्रसंघका अनुसार सन् २०२५ सम्म लगभग १.६ बिलियन डलर अझै संकलन हुन बाँकी छ। गुटेरेसले भने, “अहिलेको अवस्था धान्न सकिँदैन, यसले संस्था वित्तीय जोखिममा पारेको छ।”

त्यसैगरी, खर्च नभएको रकम देशहरूलाई फिर्ता दिनु पर्ने नियमले पनि समस्या थपेको छ। गुटेरेसले चेतावनी दिएका छन् कि यदि आर्थिक संकलनमा सुधार भएन भने २०२६ को बजेट पूरा लागू गर्न सकिने छैन, र जुलाईसम्म नियमित बजेटको नगद सकिन सक्छ।

गुटेरेसले यस संकटलाई विश्व राजनीतिमा विभाजन, अन्तर्राष्ट्रिय कानुन उल्लंघन र विकास तथा मानवीय सहायता कटौतीसँग पनि जोडेर व्याख्या गरेका छन्।

एजेन्सीको सहयोगमा ।