काठमाडौं । प्रधानमन्त्री सुशीला कार्कीले शिक्षा, विज्ञान तथा प्रविधिमन्त्री डा. महावीर पुनले रिसाएरै सरकारबाट अलग भएको स्वीकारेकी छिन् ।

पुनले केही कानुन बनाउनु भनेको तर छोटो समयमा कानुन बनाउन नसकिने भएपछि रिसाएर सरकार छाडेको बताइन् । तर, पुनले भनिएका कानुनहरू देशका लागि राम्रो रहेको उनको भनाइ छ ।

‘जहाँसम्म पुनजीको कुरा छ, पुनजी त रिसाएर हिँड्नुभएको हो । दुई/चारवटा कानुन बनाउनु भन्नु भएको थियो । ती कानुन राम्रै थियो,’ उनले सोमबार राष्ट्रियसभा बैठकमा भनिन्, ‘यो छोटो समयमा कानुन बनाएर उहाँलाई सहयोग गर्न सकेनौँ । त्यो कानुन मुलुककै लागि थियो । तर, सकेनौँ उहाँलाई सहयोग गर्नलाई ।’

उनले कानुन बनाउन बाधक अनेक परिस्थिति हुने बताइन् ।

‘अनेक परिस्थिति हुन्छ, सबै कुरो हुँदैन । त्यसकारण आफ्नो व्यक्तिगत अधिकारको कुरा हो, को राजनीतिमा जान्छ, जाँदैन भन्ने’, उनले भनिन् ।

शिक्षामन्त्री पुनले प्रधानमन्त्रीबाटै कानुन बनाउने सन्दर्भमा सहयोग नपाएपछि सांसदको चुनाव लड्न गृहजिल्ला म्याग्दी गएको बताएका छन् ।

प्रधानमन्त्री कार्कीले झण्डै तीन सातापछि सोमबार जवाफ दिएकी हुन् ।