मोरङ। कोशी प्रदेशका मुख्यमन्त्री हिक्मतकुमार कार्कीले संविधान व्यवस्था गरेअनुसार तीन तहका सरकारले समन्वय सहकार्य र सहअस्तित्वका आधारमा काम गर्नुपर्ने बताउनुभएको छ ।

विराटनगरमा आज आयोजित प्रदेशस्तरीय विकास समस्या समाधान समितिको बैठकमा उहाँले स्थानीय तह र प्रदेशबाट ९९ प्रतिशत काम सकेर सङ्घीय सरकारमा पठाउँदा पनि कतिपय विषय अगाडि नबढेको बताउनुभयो ।

मुख्यमन्त्री कार्कीले भन्नुभयो, “समन्वय सहकार्य र सहअस्तित्वको आधारमा तीनै तहका सरकार सञ्चालन हुने संविधानले व्यवस्था गरे पनि सोअनुसार भइरहेको छैन । यसले प्रदेश सरकारले राम्रोसँग काम गर्न सकेको छैन ।”

मुख्यमन्त्री कार्कीले प्रदेशमा देखिएका समस्या प्रदेशमै समस्या समाधान गर्नुपर्ने र सङ्घको समन्वयमा गर्नुपर्ने काम सङ्घसँगको सहकार्यमा गर्नपर्नेमा जोड दिनुभयो ।

बैठकमा कोशी प्रदेशको सार्वजनिक खर्च मापदण्ड र मितव्ययिता निर्देशिकाले काम गर्न अप्ठ्यारो भएको विषयमा पनि छलफल भएको थियो ।

राजस्व सङ्कलन र राजस्व दायरालाई बढाउने, कानुन, कार्यविधि निर्माण गर्ने, समपूरक बजेटबाट आउने आयोजनालाई व्यवस्थित रूपले सञ्चालन गर्नुपर्ने र बेरुजु घटाउनेलगायत विषयमा पनि छलफल भएको प्रदेश योजना आयोगका उपाध्यक्ष तारानाथ निरौलाले जानकारी दिनुभयो ।

बहुवर्षीय आयोजनाहरूको दायित्व र यसले भविष्यमा पार्ने विषयका साथै सानासाना आयोजना कार्यान्वयनमा देखापरेका समस्या, प्रदेश सरकार मातहत रहेको यातायातको अधिकार खुम्च्याउने र कृषि आयकरलगायत प्रदेशका क्षेत्राधिकारमा केन्द्र सरकारले ध्यान नदिएको विषयमा भए पनि कुरा भएको उहाँले बताउनुभयो ।

बैठकले हाल देखिएका समस्यालाई फागुनभित्रै समाधान गर्ने गरी अगाडि बढाउन आवश्यक तयारी गर्ने निर्णय गरेको छ । बैठकका विषयलाई सङ्घ सरकारसँग समन्वय गर्ने र प्रदेशले गर्नुपर्ने काम पनि तत्कालै गर्ने निर्णग गरिएको प्रदेशका प्रमुख सचिव राजेन्द्र पौडेलले जानकारी दिनुभयो ।