नेपालगन्ज। स्वास्थ्य तथा जनसङ्ख्यामन्त्री डा सुधा शर्माले बाँकेमा आमा सुरक्षा कार्यक्रम बन्द भएका कारण भेरी अस्पतालमा प्रसूतिका बिरामीको चाप बढेको विषयलाई गम्भीरताका साथ लिएको बताउनुभएको छ ।

भेरी अस्पताल नेपालगन्जको निरीक्षणपछि आज यहाँ आयोजित कार्यक्रममा मन्त्री डा शर्माले शय्या अभाव भएर बिरामीलाई उपचार दिन समस्या भएको चिकित्सकहरुको गुनासोपछि अस्पतालमा शयया वृद्धि गर्नुपर्ने विषयमा कुनै दुविधा नरहेको उल्लेख गर्नुभयो ।मन्त्री डा शर्माले भन्नुभयो, “देशको वर्तमान आर्थिक अवस्थाका कारण नयाँ संरचना निर्माणमा केही चुनौती रहे पनि समस्या समाधानका लागि मन्त्रालयले आवश्यक पहल गर्ने छ ।”

मन्त्री डा शर्माले कार्डियोलोजी विभागका लागि आवश्यक उपकरण उपलब्ध गराउने विषयमा समेत पहल गर्ने प्रतिबद्धता व्यक्त गर्नुभयो । अस्पतालबाट प्रदान हुँदै आएको डायलासिस सेवा विस्तारका लागि मन्त्रालयले सक्दो सहयोग गर्ने उहाँको भनाइ थियो ।

सिटी स्क्यान मेसिन अभावका कारण सेवा प्रभावित भएको चिकित्सकको गुनासोप्रति ध्यानाकर्षण भएको उल्लेख गर्दै मन्त्री डा शर्माले उक्त उपकरण अत्यावश्यक रहेको र यसको व्यवस्थापनका लागि पहल गरिने विश्वास दिलाउनुभयो ।

त्यसअघि मन्त्री डा शर्माले अस्पतालका विभिन्न वार्ड, इमर्जेन्सीलगायतका विभागहरूको निरीक्षण गर्नुभएको थियो । निरीक्षणका क्रममा उहाँले अस्पतालको सेवा प्रवाहबारे जानकारी लिनुभएको थियो । भेरी अस्पतालका प्रमुख मेडिकल सुपरिटेन्डेन्ट डा निराजन सुवेदीले अस्पतालको सेवा प्रवाह, समस्या तथा चुनौतीबारे प्रस्तुति दिँदै प्रसूति गृहको डिपीआर निर्माण भएकाले त्यसलाई कार्यान्वयन गर्न आग्रह गर्नुभयो ।री अस्पतालको निरीक्षण अघि मन्त्री डा शर्माले बाँकेको खजुरास्थित सुशील कोइराला प्रखर क्यान्सर अस्पताल, नेपालगन्जको सञ्जीवनी शिक्षण अस्पतालको निरीक्षण गर्नुभएको थियो ।