काठमाडौं । इरानका विदेशमन्त्री सैयद अब्बास अराघचीले जेनेभामा भएको अमेरिकासँगको अप्रत्यक्ष आणविक वार्ताको तेस्रो चरणमा राम्रो प्रगति भएको बताएका छन् ।

उनका अनुसार आगामी सोमबार भियनामा प्राविधिक वार्ता हुनेछ । विदेशमन्त्री अराघचीले राज्य सञ्चालित टेलिभिजनसँगको अन्तर्वार्तामा तेहरान र वाशिंगटनबीच जेनेभामा भएको अप्रत्यक्ष आणविक वार्ताको तेस्रो चरणमा राम्रो प्रगति भएको र चाँडै चौथो चरणको वार्ता हुने बताए ।

अराघचीकाअनुसार वार्तालाई मुख्य रूपमा ओमानका विदेशमन्त्री सय्यिद बद्र बिन हमाद बिन हमूद अल्बुसैदीले मध्यस्थता गरेका छन् ।

अन्तर्राष्ट्रिय आणविक ऊर्जा एजेन्सीका महानिर्देशक राफेल ग्रोसीले पनि केही क्षेत्रमा प्राविधिक योगदान दिए । जसलाई फाइदाजनक ठानिएको छ ।

यो पछिल्लो वार्ता इरान र अमेरिकाबीच बढ्दो तनाव र पश्चिम एसियामा अमेरिकी सैन्य निर्माणको बीचमा भएको हो ।

यसअघिका पहिलो र दोस्रो चरणको वार्ता यसै महिनाको सुरुमा ओमानको राजधानी मस्कट र जेनेभामा भएका थिए ।

यो वार्ताले आणविक सम्झौताको सम्भावना बढाएको देखिन्छ, तर अझै धेरै चुनौती बाँकी छन् ।

सिन्ह्वाकाे सहयाेगमा