काठमाडौं । अमेरिका र इजरायलको संयुक्त सैन्य आक्रमणको निशाना इरानको एक गल्र्स होस्टेल हुँदा त्यहाँ मृत्यु हुनेको संख्या ५३ पुगेको छ ।

इरानको सरकारी इस्लामिक रिपब्लिक न्युज एजेन्सी (आईआरएनए) ले कन्या विद्यालय (गर्ल्स स्कुल) मा शनिबार गरिएको हवाई हमलामा मृत्यु भएकाको संख्या ५३ पुगेको जनाएको छ।

एजेन्सीले देशको शिक्षा मन्त्रालयका प्रवक्तालाई उद्धृत गर्दै उक्त जानकारी दिएको हो।

यसअघि एजेन्सीले इरानको दक्षिणी होर्मोज्गान प्रान्तको मिनाब काउन्टीमा रहेको गर्ल्स प्राथमिक विद्यालयमा आक्रमण भएको रिपोर्ट गरेको थियो।

शिक्षा मन्त्रालयका प्रवक्ताले एजेन्सीलाई शनिबार विद्यालयमा ‘तीनवटा क्षेप्यास्त्र प्रहार’ भएको बताए। उनले आक्रमणमा ६३ जना घाइते पनि भएको बताएका छन्।

उनका अनुसार सम्भावित पीडितहरूको खोजी गर्न विद्यालयबाट भग्नावशेष हटाइँदै छ।

इजरायलले अमेरिकासँग मिलेर शनिबार बिहान राजधानी तेहरानसहित इरानका १० सहरमा भीषण हवाई आक्रमण गरेको हो।

यसैबिच इरानका विदेशमन्त्री अब्बास अराघचीले देशका सर्वोच्च नेता अयातोल्लाह अली खामेनी सुरक्षित रहेको बताएका छन्।

एनबीसी न्युजसँग उनले भनेका छन्, ‘मलाई थाहा भएसम्म इरानका सर्वोच्च नेता अयातोल्लाह अली खामेनी जीवित छन्।’

उनले इजरायल-अमेरिकाको आक्रमणमा इरानले ‘सायद एक वा दुई कमान्डर भने गुमाएको’ बताएका छन्।

इरानको सरकारी सञ्चारमाध्यमले भने अहिलेसम्म इरानका वरिष्ठ राजनीतिक अधिकारी र सेना प्रमुख मारिएको खबरलाई खारेज गरेको छ।

तर रोयटर्सले यसैबिच स्रोतलाई उद्धृत गर्दै आक्रमणमा इरानका रक्षामन्त्री अमिर नासिरजादेह र रिभोलुसनरी गार्ड्स (आईआरजीसी) का कमान्डर मोहम्मद पाकपुर मारिएको दाबी गरेको छ।