जनमत पार्टीका अध्यक्ष सीके राउतले संसदीय राजनीतिबाट सन्न्यास लिने निर्णय सार्वजनिक गरेका छन्। तथापि, जनताको पक्षमा संघर्षको राजनीति भने जारी राख्ने उनले स्पष्ट पारेका छन्।

सामाजिक सञ्जालमा आफ्नो अवस्था खुलाउँदै राउतले लेखेका छन्: संसदीय पदको दौडधूपबाट आफू टाढा रहने भए पनि राजनीतिबाट पूर्णतः अलग नभई आफ्नो सिद्धान्त र एजेन्डालाई अगाडि बढाउँदै जनतासँगै रहने प्रतिबद्धता उनको छ।

२०७९ सालको निर्वाचनमा जनमत पार्टीले राष्ट्रिय दलको मान्यता पाएको थियो र राउत आफैं प्रत्यक्ष निर्वाचनमा विजयी भएका थिए। तर हालै सम्पन्न २०८२ फागुन २१ को निर्वाचनमा पार्टीले एक सिट पनि जित्न सकेन। सप्तरी २ बाट उठेका राउत रास्वपाका रामजी यादवसँग पराजित भए भने समानुपातिकतर्फ पनि थ्रेसहोल्ड नकाटिएकाले पार्टी पूर्णतः खाली हात रह्यो।

यस पराजयपछि पनि राउतले पार्टी छाड्ने संकेत दिएका छैनन्। जनमत पार्टीलाई आगामी स्थानीय र प्रदेश निर्वाचनका लागि तयार पार्ने प्रतिबद्धता व्यक्त गर्दै आवश्यकता रहेसम्म नेतृत्व दिइरहने उनले बताए।

उल्लेखनीय छ, राउतले पार्टीको अध्यक्ष पद र संसदीय निर्वाचन दुवै आफ्नो व्यक्तिगत इच्छाविपरीत अरुको आग्रहमा स्वीकार गरेको दाबी गर्दै आएका छन्।