काठमाडौं। नेपाली नयाँ वर्ष २०८३ को अवसरमा राजधानीको प्रमुख पर्यटकीय क्षेत्र ठमेलमा ‘ठमेल सडक महोत्सव’ आयोजना हुने भएको छ।

ठमेल पर्यटन विकास परिषद्को आयोजनामा काठमाडौँ महानगरपालिका-२६ त्रिदेवीमार्ग क्षेत्रमा सोमबार दिउँसो महोत्सव सञ्चालन गरिनेछ। नेपाली नयाँ वर्षलाई अन्तर्राष्ट्रिय स्तरमा प्रवर्द्धन गर्ने उद्देश्यले कार्यक्रम गर्न लागिएको परिषद्ले जनाएको छ।

परिषद्का उपाध्यक्ष सहदेव धमला (विमल)का अनुसार महोत्सवमा सडकभर विभिन्न स्टल राखेर खानाका परिकार र सामग्रीहरूको प्रदर्शनी गरिनुका साथै मौलिक सांस्कृतिक कार्यक्रम प्रस्तुत गरिनेछ।

उनका अनुसार त्रिदेवीमार्ग क्षेत्रमा ३२ वटा स्टल राखी खाना प्रवर्द्धन तथा सामग्री बिक्री गरिनेछ। साँझ ६ बजेदेखि सुरु हुने सांस्कृतिक कार्यक्रममार्फत नयाँ वर्षलाई स्वागत गरिनेछ भने कार्यक्रम राति १२:३० बजे समापन हुने जनाइएको छ।

नेपाल आउने विदेशी पर्यटकमध्ये करिब ८० प्रतिशतले ठमेल क्षेत्र भ्रमण गर्ने भएकाले महोत्सवमा आन्तरिक तथा बाह्य पर्यटकको उल्लेख्य सहभागिता रहने अपेक्षा गरिएको छ।