काठमाडौं । ट्रकको ठक्करबाट गम्भीर घाइते भएका ट्राफिक प्रहरी निरीक्षक (इन्स्पेक्टर) अभय लामाको उपचारका क्रममा निधन भएको छ।

३२ वर्षीय लामा सवार रहेको बा.प्र.०२-०२९ प ९४१५ नम्बरको मोटरसाइकललाई बा.प्र.०३-००१ ख १७१५ नम्बरको ट्रकले आइतबार राति करिब ११:१५ बजे ठक्कर दिएको थियो।

उक्त दुर्घटना तारकेश्वर नगरपालिका-८ डाँडागाउँस्थित सडकमा भएको हो। नेपालटारबाट फुटुङतर्फ जाँदै गरेका लामालाई विपरीत दिशाबाट आएको ट्रकले ठक्कर दिएको प्रहरीले जनाएको छ।

दुर्घटनापछि गम्भीर घाइते उनलाई उद्धार गरी प्रारम्भिक उपचारका लागि त्रिवि शिक्षण अस्पताल लगिएको थियो। त्यहाँबाट थप उपचारका लागि बीएण्डबी अस्पताल पठाइएको भए पनि उपचारकै क्रममा उनको निधन भएको उपत्यका ट्राफिक प्रहरी कार्यालयका एसपी नरेशराज सुवेदीले जानकारी दिएका छन्।

लामा उपत्यका ट्राफिक प्रहरी कार्यालयको मानव स्रोत व्यवस्थापन शाखामा कार्यरत थिए। रामेछाप घर भएका उनी हाल तारकेश्वर नगरपालिका–७ फुटुङमा बस्दै आएका थिए।

उनले २०७२ सालमा प्रहरी जवान पदमा सेवा प्रवेश गरेका थिए। पछि खुला प्रतिस्पर्धाबाट प्रहरी सहायक निरीक्षक र त्यसपछि पुनः प्रतिस्पर्धाबाट प्रहरी निरीक्षक (इन्स्पेक्टर) पदमा पदोन्नति भएका थिए।

प्रहरीले ठक्कर दिने ट्रक चालक मकवानपुरको मनहरी-५ का ३८ वर्षीय राम मोक्तानलाई नियन्त्रणमा लिएको जनाएको छ। थप अनुसन्धान भइरहेको प्रहरीले बताएको छ।