काठमाडाैं। राष्ट्रिय स्वतन्त्र पार्टी (रास्वपा) भित्र गृहमन्त्री सुधन गुरुङको कार्यशैलीप्रति प्रश्न उठ्न थालेको छ।

गृहमन्त्री गुरुङ अनुगमन तथा स्थलगत निरीक्षणका क्रममा जिल्ला भ्रमणमा जाँदा सम्बन्धित क्षेत्रका सांसदलाई जानकारी नगराइएको भन्दै पार्टीभित्र असन्तुष्टि देखिएको हो।

काभ्रे-१ का सांसद मधु चौलागाईंले प्रधानमन्त्री बालेन्द्र शाहसँग भएको छलफल तथा संसदीय दलको बैठकमा गृहमन्त्री गुरुङको कार्यशैलीप्रति आलोचना गरेका छन्। बागमती प्रदेशका संघीय सांसदहरूसँग प्रधानमन्त्री शाहले सोमबार गरेको छलफलका क्रममा पनि यो विषय उठेको बताइएको छ।

सांसद चौलागाईं र धादिङ-१ की सांसद आशिका तामाङले गृहमन्त्री गुरुङले जिल्ला भ्रमण गर्दा आफूहरूलाई समन्वय वा जानकारी नगराएको भन्दै असन्तुष्टि जनाएका हुन्।

गृहमन्त्री गुरुङ गत मंगलबार काभ्रेको रोशी खोलामा भएको बाढीपहिरो प्रभावित क्षेत्रको स्थलगत निरीक्षणमा पुगेका थिए। उनले विपद् प्रभावित स्थानीयको अवस्था बुझ्नुका साथै विभिन्न क्रसर उद्योगको पनि अनुगमन गरेका थिए।

निरीक्षणका क्रममा उनले अवैध रूपमा सञ्चालन भएका क्रसर उद्योग तत्काल बन्द गर्न निर्देशन दिएका थिए। क्रसर उद्योगका कारण नदी दोहन भई पहिरो र वातावरणीय क्षति बढेको भन्दै उनले कडा कदम चाल्नुपर्ने बताएका थिए।

यसअघि ठेक्कापट्टामा सेटिङ मिलाएर अवैध क्रसर सञ्चालन हुँदै आएको आरोप लागे पनि अब त्यसलाई सह्य नहुने उनको भनाइ थियो।

तर, काभ्रे-१ का सांसद चौलागाईंले विपद् व्यवस्थापनसम्बन्धी स्थानीय जानकारी गृहमन्त्रीलाई दिन नपाएको भन्दै असन्तुष्टि व्यक्त गरे। उनका अनुसार, विपद् व्यवस्थापन गृहको जिम्मेवारी भए पनि स्थानीय जनप्रतिनिधिलाई समन्वय नगरी गरिएको निरीक्षण प्रभावकारी हुन नसक्ने हुन्छ।

उनले सुरक्षाका दृष्टिले पनि गृहमन्त्रीको भ्रमणका बेला स्थानीय सांसदलाई जानकारी दिनु आवश्यक हुने बताए। सम्भावित जोखिमको अवस्थामा आफूलाई पनि जवाफदेही बन्नुपर्ने अवस्था आउने भएकाले यस्तो समन्वय अपरिहार्य भएको उनको तर्क छ।

धादिङ-१ की सांसद आशिका तामाङले पनि गृहमन्त्रीको भ्रमणबारे आफूलाई जानकारी नदिएको भन्दै प्रधानमन्त्रीसमक्ष गुनासो राखेकी थिइन्।

यसबारे प्रधानमन्त्री बालेन्द्र शाहले भने खासै प्रतिक्रिया नदिएको सांसद चौलागाईंले बताएका छन्।

यसैबीच, गृहमन्त्री गुरुङ देशका विभिन्न विकास निर्माण आयोजनाहरूको स्थलगत निरीक्षणमा सक्रिय छन्। उनले चितवनसहित विभिन्न जिल्लामा पूर्वाधार परियोजनाको अवलोकन गर्दै निर्माण कार्य छिटो सम्पन्न गर्न निर्देशन दिइरहेका छन्।

सोमबार उनले नारायणगढ-बुटवल सडक खण्डको निरीक्षण गर्दै निर्माण कम्पनीलाई निर्धारित समयभित्र काम सम्पन्न गर्न कडा चेतावनी दिएका थिए।

उनका अनुसार ढिलाइका कारण यात्रुहरूले सास्ती भोग्नुपरेको, दैनिक आवागमन प्रभावित भएको र दुर्घटनाको जोखिम बढेको छ। उनले ठेकेदार कम्पनीले समयमै काम नगरे कडा कारबाही हुने संकेत पनि दिएका छन्।