काठमाडौं । उत्तरी छिमेकी चीन नेपालको नयाँ सरकारप्रति सशंकित बनेको छ ।

अमेरिकी प्रभाव बढ्दै गए नेपालमा रहेका तिब्बती शरणार्थी र ताइवानी नागरिकहरूले चीनविरोधी गतिविधि गर्ने भन्दै चीन चिन्तित भएको हो ।

हालै गृहमन्त्री सुधन गुरुङलाई राजदूत चाङ माओमिङले भेटेर नेपाल बेइजिङविरुद्ध विदेशी स्वार्थको मञ्च नबन्ने ग्यारेन्टी खोजेका छन् ।

गत २८ मार्चमा एभरेस्ट नेपाल कल्चरल ग्रुपले आयोजना गरेको १३औँ अन्तर्राष्ट्रिय लोक महोत्सवमा केहीबेर ताइवानी झण्डा फहराइएको थियो र विरोधपछि हटाइएको थियो ।

ताइवानलाई चीनले आफ्नो अभिन्न अंक भन्दै आएको छ । तिब्बत त चीनअन्तर्गतको स्वायत्त क्षेत्र हो । तर, तिब्बती पृथकतावादीहरू र ताइवानीहरूलाई अमेरिकासहित पश्चिमा देशहरूले चीनविरुद्ध प्रयोग गरेको भन्दै चीन रुष्ट छ ।

गृहमन्त्री गुरुङसँग चिनियाँ राजदूत माओमिङले चीनविरुद्ध विदेशी स्वार्थको मञ्च नेपाल नहोस् भनेर चासो राखेका हुन् ।

गत जेन–जी विद्रोहको बेला किशोर तिब्बती शरणार्थीहरूले स्वतन्त्र तिब्बतको नारा घन्काएका थिए । तिबेटान ओर्जिनल ब्लड भएको टिसर्ट लगाएर जेन–जी विद्रोहमा घुसपैठ गरेको गौरीबहादुर कार्की आयोगले नै प्रतिवेदनमा उल्लेख गरेको छ । हालका गृहमन्त्री गुरुङलाई टीओबीसँग निकट नेता ठानिन्छ ।

अर्कोतिर, बालेन्द्र शाह प्रधानमन्त्री भएपछि उनलाई निर्वासित तिब्बती धर्म गुरु दलाई लामाको सरकारका प्रमुख पेन्पा छिरिङले बधाइ दिएका छन् । सुशीला कार्की प्रधानमन्त्री हुँदा त दलाई लामाले नै बधाई दिएका थिए ।

चीनको बुझाईमा पछिल्लो समय नेपालमा चीनविरोधी गतिविधि बढेको छ । जुन चीनका लागि पाच्य होइन ।

यस्तोमा गृहमन्त्री गुरुङलाई चिनियाँ राजदूत माओमिङले भेटेर चासो राखेका हुन् ।