धनगढी। कैलालीमा हाइस र मोटरसाइकल एकापसमा ठोक्किँदा दुई जनाको ज्यान गएको छ। लम्कीचुहा नगरपालिका-७ गुलरास्थित पूर्व-पश्चिम राजमार्गमा सुपप्र ०१-००१ ज १४२१ नम्बरको हाइसले सुपप्र ०१-१३ प ५१३९ नम्बरको मोटरसाइकललाई ठक्कर दिएको हो।

जिल्ला प्रहरी कार्यालयका अनुसार दुर्घटनामा मोटरसाइकलमा सवार लम्कीचुहा नगरपालिका-८ का ३३ वर्षीय गगन राना मगर र २४ वर्षीय पुष्प सुनारको मृत्यु भएको छ। दुर्घटनामा गम्भीर घाइते भएका दुवै जनालाई उपचारका लागि टीकापुर अस्पताल लगिएको थियो। तर उपचारकै क्रममा उनीहरूको मृत्यु भएको प्रहरीले जनाएको छ।

दुर्घटनामा संलग्न हाइस प्रहरीले नियन्त्रणमा लिएको छ भने फरार रहेका चालकको खोजी कार्य जारी रहेको छ।