काठमाडौं।  कालीगण्डकी नदीमा पौडी खेल्न छिरेका दुई जना पुरुषको शव फेला परेको छ।

नयाँ वर्षका दिन बगनासकाली गाउँपालिका-७ दैलातुङस्थित कालीगण्डकी नदीमा पौडी खेल्ने क्रममा सोही गाउँपालिका–९ चापपानीका ३९ वर्षीय शरण भुषाल र २९ वर्षीय तोयनाथ बस्याल बेपत्ता भएका थिए।

जिल्ला प्रहरी कार्यालय पाल्पाका अनुसार बेपत्ता भएको भोलिपल्ट तोयनाथको शव फेला परेको हो। बगनासकाली गाउँपालिका-७ दैलातुङमै नदीको बीच भागमा बुधबार बिहान ७ः५५ बजे तोयनाथको शव फेला परेको थियो।

शरणको शव पनि बिहीबार बिहान ८ बजे नदीको बीच भागमा तैरिरहेको अवस्थामा फेला परेको डिएसपी चौधरीले जानकारी दिए। घटनास्थलबाट १५० मिटर पूर्वतर्फ उनको शव भेटिएको हो।

मंगलबार ४ जनाको समूह बनाएर उनीहरू पौडी खेल्न गएका थिए। नदीमा पसेका चार जना मध्य दुई जना बगेर बेपत्ता भएको र बाँकी दुई जनाले पौडिएर ज्यान जोगाउन सफल भएका थिए।