काठमाडौं। नेपालमा हाल पश्चिमी तथा स्थानीय वायुको आंशिक प्रभावका कारण मौसम मिश्रित बनेको छ। मौसम पूर्वानुमान महाशाखाका अनुसार पहाडी र हिमाली क्षेत्रमा बादल लाग्ने-हट्ने क्रम जारी छ भने तराईमा चर्को घामसँगै तापक्रम बढ्न थालेको छ।

यतिबेला कोशी, बागमती र गण्डकी प्रदेशका पहाडी तथा हिमाली भू–भागमा सामान्यतया बदलीको अवस्था रहेको छ। गण्डकी प्रदेशका केही पहाडी स्थानमा मेघगर्जन र चट्याङसहित हल्का वर्षा भइरहेको छ। अन्य पहाडी क्षेत्रमा आंशिक बदली रहे पनि तराईका अधिकांश स्थानमा मौसम सफा देखिएको छ।

मौसम विज्ञान विभागले शुक्रबारका लागि सार्वजनिक गरेको पूर्वानुमान अनुसार कोशी, बागमती र गण्डकी प्रदेशका पहाडी तथा हिमाली क्षेत्रमा वर्षा र हिमपातको सम्भावना छ। यी क्षेत्रका केही स्थानमा चट्याङसहित हल्का वर्षा हुने अनुमान गरिएको छ। साथै, कर्णाली र सुदूरपश्चिम प्रदेशका उच्च हिमाली भू–भागका एक–दुई स्थानमा हल्का हिमपात पनि हुन सक्ने जनाइएको छ।

पहाडी क्षेत्रमा वर्षाको सम्भावना रहे पनि तराई र भित्री मधेसमा गर्मी अझ बढ्ने संकेत देखिएको छ। मधेस, लुम्बिनी र सुदूरपश्चिम प्रदेशका तराई क्षेत्रमा तापक्रम वृद्धि भई तातो दिनको अवस्था सिर्जना हुन सक्ने भएकाले जनजीवन प्रभावित हुन सक्ने अनुमान गरिएको छ।