काठमाडौं । प्रधानमन्त्री तथा काठमाडौँ महानगरपालिकाका प्रमुख बालेन शाहले आफूविरुद्ध रहेको अदालतको अवहेलना मुद्दामा वारेस राख्न माग गर्दै सर्वोच्च अदालतमा निवेदन दिएका छन्।

उक्त निवेदनमाथि शुक्रबार न्यायाधीशद्वय हरिप्रसाद फुयाँल र शान्तिसिंह थापाको इजलासमा सुनुवाइ हुने भएको हो। बालेन शाहले बिहीबार वारेस राख्ने अनुमति माग गर्दै निवेदन दायर गरेका थिए।

यसअघि पनि उनले वारेस राख्न माग गरेका थिए, तर अदालतले अस्वीकार गरेपछि उनी आफैं उपस्थित भएर तारेख धाउँदै आएका थिए।

यो मुद्दा पाटन उच्च अदालतको आदेशसँग सम्बन्धित घटनापछि सुरु भएको हो, जसमा महानगरको निर्णयविरुद्ध अन्तरिम आदेश जारी गरिएको थियो। त्यसपछि बालेन शाहले सामाजिक सञ्जालमार्फत अदालतप्रति आपत्तिजनक अभिव्यक्ति दिएको आरोपमा अवहेलना मुद्दा दायर गरिएको थियो।

उक्त प्रकरणमा अधिवक्ता वर्षा कुमारी झाले सर्वोच्च अदालतमा निवेदन दायर गरेकी थिइन्। त्यसपछि अदालतले बालेन शाहलाई किन कारबाही नगर्ने भन्ने विषयमा लिखित जवाफ मागेको थियो। उनले आफ्नो जवाफमा अदालतको आदेश उल्लंघन नगरेको दाबी गरेका थिए।