काठमाडौं।  वसुन्धरा-मान प्रज्ञाप्रतिष्ठानले यस वर्षको प्रतिष्ठित ‘वसुन्धराश्री पुरस्कार’ वरिष्ठ साहित्यकार तथा पूर्वप्रधानमन्त्री लोकेन्द्रबहादुर चन्द लाई प्रदान गर्ने निर्णय गरेको छ।

प्रतिष्ठानका कुलपति डा. दुबसु क्षेत्रीको अध्यक्षतामा आइतबार बसेको बैठकले उक्त निर्णय गरेको हो। नेपाली साहित्यको कथा, नाटक र निबन्ध विधामा विशिष्ट योगदान पुर्‍याई नेपाली वाङ्मयलाई समृद्ध बनाउन भूमिका खेलेकाले चन्दलाई सम्मान गर्ने निर्णय गरिएको हो।

वि.सं. १९९७ मा बैतडीमा जन्मेका चन्दका ‘विसर्जन’, ‘हिउँको तन्ना’, ‘बाह्रौँ खेलाडी’ र ‘नेताका साथी’ लगायतका कृतिहरू प्रकाशित छन्।

यसैगरी, प्रतिष्ठानले यस वर्षको ‘मानश्री पुरस्कार’ आध्यात्मिक चिन्तक तथा बोधिसत्व स्वामी आनन्द अरुण लाई प्रदान गर्ने निर्णय गरेको छ। योग, ध्यान तथा आध्यात्मिक दर्शनको विस्तारमार्फत नेपाली सभ्यता र वाङ्मयको श्रीवृद्धिमा योगदान दिएको भन्दै उनलाई सम्मान गर्न लागिएको हो।

वि.सं. २००१ मा जनकपुरमा जन्मेका स्वामी आनन्द अरुणका ‘अन्तरयात्रा’, ‘सन्तगाथा’ लगायतका कृतिहरू विभिन्न विदेशी भाषामा समेत अनुवाद भएका छन्।

यी दुवै पुरस्कारको राशि जनही ७५ हजार रुपैयाँ र सम्मानपत्र रहेको प्रज्ञाप्रतिष्ठानले जनाएको छ।