बागलुङ। गत फागुन ८ गतेदेखि ढोरपाटन नगरपालिका-७, ८ र ९ मा फैलिएको दादुरा संक्रमण अहिले नियन्त्रणमा आउन थालेको छ।

विश्व स्वास्थ्य सङ्गठन, प्रदेश जनस्वास्थ्य कार्यालय र स्थानीय तहका स्वास्थ्यकर्मीहरूको संयुक्त टोलीले प्रभावित क्षेत्रमा पुगेर अध्ययन तथा खोप अभियान सञ्चालन गरेपछि संक्रमण घट्दै गएको हो। फागुन २९ गतेदेखि चैत २ गतेसम्म बालबालिका तथा किशोरकिशोरीलाई खोप लगाएपछि यसको प्रभाव देखिन थालेको जनाइएको छ।

खोप अभियानअघि दैनिक १० देखि १५ जनासम्म शंकास्पद बिरामी अस्पताल पुग्ने गरेका थिए। तर पछिल्लो आठ दिनमा यो संख्या घटेर मंगलबार निसीखोला गाउँपालिकाका एक जना शंकास्पद बिरामी मात्र बुर्तिबाङ अस्पतालमा भर्ना भएको प्रदेश जनस्वास्थ्य कार्यालय का प्रमुख प्रवीण शर्माले जानकारी दिए।

हालसम्म २३९ जना शंकास्पद बिरामी देखिएकामा ३४ जनाको नमूना परीक्षणका लागि काठमाडौँस्थित राष्ट्रिय जनस्वास्थ्य प्रयोगशाला पठाइएको थियो, जसमध्ये १४ जनामा दादुरा संक्रमण पुष्टि भएको छ।

प्रदेश जनस्वास्थ्य कार्यालयका अनुसार हालसम्म १० देखि १९ वर्ष उमेर समूहका ६ हजार १४० जना बालबालिका तथा किशोरकिशोरीलाई खोप लगाइएको छ। अधिकांश बिरामी निको भइसकेका छन् भने एक जना मात्रै उपचाररत रहेको जनाइएको छ।