काठमाडौं। मेघौली फिल्म्सको ब्यानरमा निर्माण भइरहेको डार्क कमेडी चलचित्र ‘जिरो डिग्री’ को सम्पूर्ण छायांकन सम्पन्न भएको छ। कास्कीको धिताल गाउँमा कलाकारद्वय राजन भुसाल र प्रकाश घिमिरेको अन्तिम टेक लिँदै सोमबार चलचित्रको ‘प्याकअप’ गरिएको हो।

३५ दिनको तालिका तय गरेर पोखराको अर्मलाकोट मन्दिरबाट सुरु गरिएको छायांकन ३७ दिनमा सम्पन्न भएको निर्माण पक्षले जनाएको छ। चलचित्रको छायांकन पोखरा वरपरका अर्मलाकोट, धिताल, घार्मी र बगरजस्ता रमणीय तथा मौलिक बस्तीहरूमा गरिएको हो।

सजन काफ्ले र आकास बरालको संयुक्त निर्देशन तथा पटकथा रहेको यस चलचित्रमा अभिनेता विजय बराललाई अहिलेसम्मकै फरक अवतारमा देख्न पाइने बताइएको छ।

कथाअनुसार सडक सञ्जाल नपुगेको विकट गाउँमा आमाबुबाको निधनपछि विदेशमा रहेका सन्तान नफर्किन्जेल शवलाई ‘डीप फ्रिज’मा सुरक्षित राख्ने प्रयास गर्दा उत्पन्न हुने घटनाक्रम र रमाइला परिस्थितिहरू चलचित्रको केन्द्रमा छन्।

चलचित्रमा विजय बरालसँगै प्रकाश घिमिरे, राजन भुसाल, सनिशा भट्टराई, वसुन्धरा भुसाल, रमेश बुढाथोकी, लोकेन्द्र लेखक लगायतका कलाकारहरूको अभिनय रहेको छ।

मोती कार्की कार्यकारी निर्माता रहेको चलचित्रको छायांकन निशाल पौडेलले गरेका हुन्। सम्पादन चानस पुन मगर, रंग संयोजन राजेन्द्र मोक्तान, संगीत अङ्कित बाबु अधिकारी र शब्द युवराज काफ्लेले गरेका छन्।

चलचित्रको प्रचार डिजाइन रोयल भिमसेन तथा ट्राइडेन्ट कन्सेप्ट टिमले गर्नेछन् भने वितरण उपत्यकाबाहिर कुबेर सिने डिस्ट्रिब्युसन र उपत्यकामा डीसीएनले गर्ने बताइएको छ।