काठमाडौं। श्रम संस्कृति पार्टीले प्रत्यक्ष निर्वाचित कार्यकारी राष्ट्रपति र पूर्ण समावेशी राज्य प्रणालीको व्यवस्था गर्नुपर्ने पक्षमा आफ्नो अडान सार्वजनिक गरेको छ ।

पार्टी अध्यक्ष हर्क साम्पाङले संविधान संशोधनका लागि गठन गरिएको बहसपत्र तयारी कार्यदललाई लिखित सुझाव दिँदै यी विषयहरू संविधानमै समेटिनुपर्ने माग गरेका हुन् ।

पार्टीले आफ्नो सुझावमा जनताद्वारा प्रत्यक्ष निर्वाचित कार्यकारी राष्ट्रपति हुने व्यवस्था गर्नुपर्ने उल्लेख गरेको छ । साथै, कार्यकारी राष्ट्रपतिले आफूले उपयुक्त ठानेका व्यक्तिहरू समावेश गरेर मन्त्रिपरिषद् गठन गर्न पाउने व्यवस्था हुनुपर्ने पनि प्रस्ताव गरिएको छ ।

त्यस्तै, मन्त्रिपरिषद् गठन गर्दा समावेशी सिद्धान्तलाई अनिवार्य रूपमा लागू गर्नुपर्ने व्यवस्था गर्नुपर्ने धारणा पार्टीले राखेको छ ।

अध्यक्ष साम्पाङले सार्वजनिक गरेको पत्रमा कार्यकारी प्रमुखका अधिकार र सीमाहरू स्पष्ट रूपमा निर्धारण गर्नुपर्ने, निरंकुशताको परिभाषा प्रस्ट हुनुपर्ने र यदि कार्यकारी प्रमुख निरंकुश बनेमा महाभियोगको प्रक्रिया लागू गर्नुपर्ने उल्लेख छ ।

त्यसैगरी, संसदमा महाभियोग पारित भए कार्यकारी प्रमुख पदमुक्त हुने व्यवस्था गर्नुपर्ने सुझाव पनि दिइएको छ ।