काठमाडौं। गायक तथा अभिनेता प्रकाश सपुतले समय आएपछि र पार्टीले जिम्मेवारी दिएमा आफू फेरि पनि राजनीतिमा फर्कन सक्ने बताएका छन् ।

उनी गत फागुनमा करिब डेढ महिना आफ्ना चलचित्र र गीत-संगीतका सम्पूर्ण काम सकेर राजनीतिमा उत्रिएका थिए । राष्ट्रिय स्वतन्त्र पार्टी (रास्वपा) बाट समानुपातिक सूचीमा परे पनि उनी सांसद बन्ने अवसर भने पाएनन् ।

त्यसपछि सक्रिय राजनीति छाडेर उनी आफ्नो पुरानै काममा फर्किएका थिए ।

प्रकाशमा राजनीतिक रुचि भने अझै कायम रहेको देखिन्छ । उनी हाल आफ्नो पछिल्लो चलचित्र ‘परालको आगो’ मा व्यस्त छन् । गुरुप्रसाद मैनालीको कथामा आधारित यो चलचित्र शुक्रबारदेखि नेपालसहित विभिन्न देशमा प्रदर्शन हुँदैछ ।

चलचित्रबारे काठमाडौँमा आयोजित पत्रकार भेटघाटमा उनले आफूले पूर्ण रूपमा राजनीति नछाडेको बताएका छन् ।

यद्यपि, समानुपातिक सूचीबाट सांसद बनेको भए पनि आफूले चलचित्र ‘परालको आगो’ को काम सक्न र रिलिजका लागि समय दिन कठिन हुने उनले उल्लेख गरे । सांसद नबनेकोमा उनलाई पछुतो नभएको र आफू दर्शकको सेवक भएकाले अहिले चलचित्र र गीत–संगीतमार्फत सेवा गरिरहेको पनि उनले बताए ।

उनी अहिले चलचित्रसँगै नयाँ गीत-संगीतको सिर्जनामा पनि सक्रिय छन् । चलचित्र रिलिजपछि आफ्नो स्वरमा नयाँ गीत ल्याउने योजना पनि रहेको उनले जानकारी दिए ।

नेपाली विषयमा अध्ययन गरेका प्रकाशले गुरुप्रसाद मैनालीको कथामा आधारित ‘परालको आगो’ मा मुख्य भूमिका निर्वाह गर्न पाउँदा खुसी लागेको बताए । चलचित्रमा उनले सौगात मल्ल र सुहाना थापासँग सहकार्य गरेका छन् ।

निर्देशक लक्ष्मण सुनारका अनुसार फिल्मले मैनालीको कथालाई न्याय गर्ने प्रयास गरेको छ ।