काठमाडौं । सरकारले देशभरका सबै सरकारी कार्यालयमा विद्युतीय हाजिरी प्रणाली अनिवार्य रूपमा लागू गर्न निर्देशन दिएको छ ।

संघीय मामिला तथा सामान्य प्रशासन मन्त्रालयले सबै मन्त्रालय, विभाग, कार्यालय, निकाय तथा स्थानीय तहलाई पत्राचार गर्दै विद्युतीय हाजिरी प्रणाली अनिवार्य कार्यान्वयन गर्न भनेको हो ।

मन्त्रालयले कर्मचारीको उपस्थितिको अभिलेखिकरण व्यवस्थित बनाउन विद्युतीय हाजिरी अनिवार्य गर्न निर्देशन दिएको छ । हालसम्म उक्त प्रणाली लागू नभएका कार्यालयमा कर्मचारीको दैनिक उपस्थित र प्रस्थान विवरण अनिवार्य रूपमा विद्युतीय हाजिरीमार्फत नै अभिलेख गर्नुपर्ने व्यवस्था मिलाउन पनि भनिएको छ ।

साथै, प्रत्येक १५ दिनको हाजिरी विवरण प्रिन्ट गरी प्रमाणित गरेर कार्यालयमा सुरक्षित रूपमा राख्न समेत मन्त्रालयले परिपत्र गरेको छ ।