काठमाडौं। गत २४ घण्टामा दुई हजार ६९२ जना सवारी चालक सवारी नियम उल्लंघन गरेको अभियोगमा कारबाहीमा परेका छन्। यसबाट राज्यकोषमा ७ लाख ६० हजार रुपैयाँ राजस्व संकलन भएको छ।

काठमाडौँ उपत्यका ट्राफिक प्रहरी कार्यालयका अनुसार मादक पदार्थ सेवन गरेर सवारी चलाउने ९१ जना, यान्त्रिक अवस्था ठीक नभएका ६३ सवारी साधन, ट्राफिक संकेत उल्लंघन गर्ने २२४ जना र तीव्र गतिमा सवारी चलाउने १३२ जनालाई कारबाही गरिएको हो।

यसैगरी लेन अनुशासन पालना नगर्ने २३७, सार्वजनिक सवारी साधनका ढोका बन्द नगरी सञ्चालन गर्ने ४७, निषेधित क्षेत्रमा हर्न बजाउने ७८, निर्धारित स्थानमा यात्रु चढाउने र ओराल्ने नियम उल्लंघन गर्ने ४० तथा अन्य नियम उल्लंघन गर्ने एक हजार ७८० जनालाई पनि कारबाही गरिएको छ।