काठमाडौं। कान्तिपुर मिडिया ग्रुपका प्रबन्ध निर्देशक सम्भव सिरोहियाले पदबाट राजीनामा दिएका छन्। उनले बिहीबारदेखि लागू हुने गरी आफ्नो जिम्मेवारी त्यागेको जानकारी आन्तरिक सन्देशमार्फत कर्मचारीहरूलाई दिएका हुन्।

उनले पछिल्लो समय संस्थाबाट प्रकाशित सामग्री, विशेषगरी पूर्व गृहमन्त्री सुधन गुरुङसँग जोडिएका समाचारप्रति असन्तुष्टि जनाउँदै राजीनामाको निर्णय लिएको उल्लेख गरेका छन्। उनका अनुसार पुष्टि नभएका विषयलाई अतिरञ्जित ढंगले प्रस्तुत गर्नु पत्रकारिताको मान्यतासँग मेल नखाने कुरा हो।

‘आफूले स्वीकार नगरेको शैलीको पत्रकारितासँग आफ्नो नाम जोडेर अगाडि बढ्न सम्भव छैन,’ उनले सन्देशमा उल्लेख गरेका छन्। सम्बन्धित समाचारहरू अनुसन्धान निकायका स्रोतलाई उद्धृत गर्दै सार्वजनिक गरिएका भए पनि पर्याप्त पुष्टि बिना प्रस्तुत हुँदा नयाँ सरकारमाथि अनावश्यक दबाब सिर्जना भएको उनको तर्क छ।

बिहीबार बिहान सामाजिक सञ्जालमार्फत उनले ती समाचारका अंश साझा गर्दै ‘यो कुनै उद्देश्यपूर्ण पत्रकारिता जस्तो देखिन्छ, तर त्यसको पृष्ठभूमि स्पष्ट छैन’ भन्दै टिप्पणी गरेका थिए।

उनले आफ्नो कार्यकालतर्फ फर्कँदै आफू जिम्मेवारीमा आउँदा संस्थाको आर्थिक अवस्था कमजोर भए पनि पछिल्ला प्रयासले सुधारको बाटो समातेको बताएका छन्। त्यसका लागि योगदान गर्ने सम्पूर्ण टोलीप्रति उनले आभार व्यक्त गरेका छन्।

१ असोज २०८० मा नेतृत्व सम्हालेका सिरोहियाले हालै संगठनभित्र आफ्ना विश्वासपात्रहरूलाई प्रमुख जिम्मेवारीमा ल्याउने तथा लगानी विस्तार गर्ने कदम समेत चालेका थिए। यिनै परिवर्तनबीच आएको उनको राजीनामाले संस्थाभित्रको अवस्था र सम्पादकीय अभ्यासबारे थप बहस उत्पन्न गरेको छ।