एजेन्सी।  इराकमा सक्रिय एक सशस्त्र समूहका नेताको खोजी तीव्र बनाउँदै अमेरिकी विदेश मन्त्रालयले उक्त नेताबारे विश्वसनीय सूचना दिने व्यक्तिलाई एक करोड अमेरिकी डलरसम्मको पुरस्कार दिने घोषणा गरेको छ।

इरान समर्थित मानिने कातेब सैयद अल-शुहादा (केएसएस) का नेता हाशिम फिन्यान रहिम अल–सराजीलाई लक्षित गर्दै यो घोषणा गरिएको हो। उनी ‘अबु अला अल-वलाई’ नामबाट पनि परिचित छन्।

अमेरिकी विदेश मन्त्रालयले सामाजिक सञ्जालमार्फत सार्वजनिक गरेको सूचनामा अल-सराजीको गतिविधि, ठेगाना र पहिचानबारे जानकारी दिने व्यक्तिलाई पुरस्कारसँगै स्थानान्तरणको सुविधा समेत उपलब्ध गराइने जनाएको छ।

अमेरिकाका अनुसार अल-सराजी नेतृत्वको समूहले इराकी नागरिकमाथि आक्रमण गर्नुका साथै इराक र सिरियामा रहेका अमेरिकी कूटनीतिक संरचना, सैन्य अड्डा तथा कर्मचारीलाई लक्षित गर्दै आक्रमण गरेको आरोप छ।

उक्त समूह इराकको राजनीतिक संरचनाभित्रै, विशेषगरी शिया गठबन्धनसँग सम्बद्ध सत्तारूढ शक्तिहरूमध्ये एकको रूपमा रहेको बताइन्छ। यसले इराकमा सशस्त्र समूहहरूको राजनीतिक प्रभाव अझै बलियो रहेको देखाएको छ।

लामो द्वन्द्वपछि केही स्थिरता देखिएको इराकमा पछिल्ला क्षेत्रीय तनावका कारण पुनः अस्थिरताको जोखिम बढेको विश्लेषण गरिएको छ। विशेषगरी फेब्रुअरी २८ मा अमेरिका र इजरायलद्वारा इरानमाथि गरिएको आक्रमणपछि मध्यपूर्वमा तनाव चर्किएको हो, जसको प्रभाव इराकसम्म पुगेको बताइन्छ।

यसअघि पनि अमेरिकी विदेश मन्त्रालयले कातेब हिजबुल्लाहका एक नेतामाथि यस्तै प्रकारको इनाम घोषणा गरेको थियो। ती नेता अमेरिकी पत्रकार शेली किटलेसनको अपहरणमा संलग्न रहेको आरोपमा जोडिएका थिए।

यसैबीच, अमेरिकी मिडिया रिपोर्टअनुसार वासिङ्टनले इराकमा नगद ढुवानी रोक्ने र सुरक्षा कार्यक्रमका लागि दिइँदै आएको कोष कटौती गर्ने निर्णय गरेको छ। तेहरान समर्थित समूहहरूमाथि दबाब बढाउने उद्देश्यले गरिएको यो कदमले बग्दाद-वासिङ्टन सम्बन्धमा थप कूटनीतिक तनाव सिर्जना गरेको विश्लेषण गरिएको छ।