मुम्बई ।  बलिउडकी सदाबहार अभिनेत्री काजोलले आफ्नो ३० वर्ष लामो फिल्मी करियरमा पहिलो पटक अनस्क्रिन ‘किस’ गर्दाको अनुभव सार्वजनिक गरेकी छन्।

‘दिलवाले दुल्हनिया ले जाएंगे’, ‘कुछ कुछ होता है’ र ‘कभी खुसी कभी गम’ जस्ता सफल फिल्महरूमा अभिनय गर्दा सधैँ ‘नो किसिङ पोलिसी’ अपनाउँदै आएकी काजोलले सन् २०२३ मा रिलिज भएको ‘द ट्रायल : प्यार, कानुन, धोका’ मार्फत उक्त नियम तोडेकी थिइन्।

अन्तर्राष्ट्रिय युट्युबर तथा प्रस्तोता Lilly Singh को पोडकास्टमा कुरा गर्दै काजोलले यो निर्णय व्यक्तिगत रहर नभई पात्रको आवश्यकताका कारण लिएको स्पष्ट पारिन्। सिरिजमा आफ्ना सह-अभिनेता जीशु सेनगुप्ता सँगको दृश्यबारे उनले भनिन्, ‘यो केवल एउटा किस मात्र थिएन, बरु पात्रको सोच, भावना र उसको जीवनका घटनाहरूको महत्त्वपूर्ण अंश थियो। यदि यो दृश्य हटाइन्थ्यो भने पात्र नै अधुरो हुन्थ्यो।’

काजोलले उक्त दृश्यको सुटिङका क्रममा आफू मानसिक रूपमा तनावग्रस्त र असहज महसुस गरेको पनि बताइन्। ‘म निकै असहज थिएँ। कहिले त लाग्थ्यो बीचमै रोकिदिन्छु कि भन्ने, तर अन्ततः मैले यसलाई व्यावसायिक निर्णयका रूपमा लिएँ र पूरा गरेँ,’ उनले भनिन्।

अमेरिकी शो ‘द गुड वाइफ’ को भारतीय संस्करण ‘द ट्रायल’ मा काजोलले नोयोनिका सेनगुप्ताको भूमिका निभाएकी छन्, जहाँ उनी श्रीमानको स्क्यान्डलपछि पुनः कानुनी पेशामा फर्किने पात्रका रूपमा देखिन्छिन्। यही सिरिजमार्फत काजोलले डिजिटल प्लेटफर्ममा पनि आफ्नो डेब्यु गरेकी हुन्।