काठमाडौं । अपाङ्गता भएका व्यक्तिहरूको अधिकारका लागि काम गर्दै आएका १० संस्थाले राष्ट्रिय अपाङ्ग महासंघ नेपाल सहभागी हुने कुनै पनि कार्यक्रममा बहिष्कार गर्ने घोषणा गरेका छन्। यी संस्थाहरूले महासंघले आफ्नै महाधिवेशनमा अपाङ्गता भएका व्यक्तिमाथि दमन र कुटपिट गरेको गम्भीर आरोप लगाएका छन्।

ध्यानाकर्षण पत्रमार्फत उनीहरूले महिला, बालबालिका तथा ज्येष्ठ नागरिक मन्त्रालयले शुक्रबार आयोजना गरेको अन्तरक्रिया कार्यक्रममा महासंघको प्रतिनिधि सहभागी भएपछि आफूहरूले कार्यक्रम बहिष्कार गर्नुपरेको स्पष्ट पारेका छन्।

संस्थाहरूका अनुसार रुपन्देहीको तिलोत्तमा नगरपालिकामा भएको महासंघको साधारण सभा तथा महाधिवेशन अवैध र जालसाजीपूर्ण तरिकाले चलाइयो, र त्यस क्रममा प्रहरी, बाउन्सर, सेक्युरिटी, स्वयंसेवकका नाममा राखिएका व्यक्तिहरूबाट अपाङ्गता भएका व्यक्तिहरूमाथि कुटपिट, डरधम्की र सहायक सामग्रीसमेत तोडफोड गरियाे ।

ध्यानाकर्षण पत्रमा भनिएको छ—
‘महासंघबाटै अपाङ्गता भएका व्यक्तिहरूमाथि दमन भएको अवस्थामा महासंघ सहभागी हुने कुनै पनि गतिविधिमा हामी सहभागी नहुने निर्णयअनुसार कार्यक्रम बहिष्कार गरिएको हो।’

यी संस्थाहरूले मन्त्रालयलाई स्पष्ट जानकारी गराउँदै भनेका छन् कि महासंघको प्रतिनिधि उपस्थित नभएको अवस्थामा मात्र आफूहरूले यस्ता कार्यक्रममा सहभागी हुनेछन्।

बहिष्कार गर्ने १० संस्था

• स्वलम्बन जीवन पद्दति केन्द्र
• अपाङ्गता भएका महिलाहरूको महासंघ
• वैदिक अपाङ्गता अभिभावक महासंघ
• नेपाल हेमोफिलिया सोसाइटी
• नेपाल अपाङ्ग महिला संघ
• नेपाल अपाङ्ग मानवअधिकार केन्द्र
• अटिजम केयर नेपाल
• राष्ट्रिय शारीरिक अपाङ्ग महासंघ
• नेपाल होचापुड्का संघ

मन्त्रालयले शुक्रबार अपाङ्गता भएका व्यक्तिको अधिकारसम्बन्धी ऐन, २०७४ को संशोधन मस्यौदाबारे बिहान अन्तरक्रिया कार्यक्रम आयोजना गरेको थियो।