काठमाडौं। स्वास्थ्य तथा जनसंख्या मन्त्रालयले स्वास्थ्य समूहका एघारौँ तहका अधिकृतहरूको सरुवा तथा काज फिर्ता गर्दै विभिन्न महाशाखा र विभागमा जिम्मेवारी हेरफेर गरेको छ।

स्वास्थ्य मन्त्री निशा मेहता ले शुक्रबार मन्त्रीस्तरीय निर्णय गर्दै मन्त्रालय, विभाग तथा केन्द्रका केही महाशाखा प्रमुखहरूको जिम्मेवारी पुनः निर्धारण गरेकी हुन्।

मन्त्रालयको कर्मचारी प्रशासन महाशाखाका प्रमुख दिवश आचार्य का अनुसार रिक्त रहेको स्वास्थ्य सेवा विभाग अन्तर्गतको इपिडिमियोलोजी तथा रोग नियन्त्रण महाशाखा प्रमुखमा डा. अनुज भट्टचन लाई जिम्मेवारी दिइएको छ। त्यसको स्थानमा डा. चुमनलाल दास लाई पठाइएको छ।

त्यस्तै, परिवार कल्याण महाशाखाका प्रमुख डा. मदन उपाध्याय लाई नारायणी अस्पतालमा सरुवा गरिएको छ।

मन्त्रालयअन्तर्गत स्वास्थ्य आपतकालीन तथा विपद् व्यवस्थापन इकाई (एचईओसी) का प्रमुख तथा प्रवक्ता डा. प्रकाश बुढाथोकी लाई वीर अस्पतालमा काज फिर्ता गरिएको छ। अब मन्त्रालयको प्रवक्ताको जिम्मेवारी समन्वय महाशाखा प्रमुख यशोदा अर्याल ले सम्हाल्ने भएकी छन्।

यसैबीच, राष्ट्रिय स्वास्थ्य तालिम केन्द्रमा डा. प्रकाशप्रसाद साह लाई जिम्मेवारी दिइएको छ भने नीति योजना महाशाखामा कार्यरत डा. पुष्पराज पौडेल लाई नरदेवी अस्पतालमा काज फिर्ता गरिएको मन्त्रालयले जनाएको छ।