काठमाडौं । बालेन प्रधानमन्त्री भएको ठ्याक्कै एक महिना हुँदा देशका विभिन्न ठाउँका सुकुम्बासी बस्तीमा डोजर चलेको छ । डोजरसँगै हजारौँ सुरक्षाकर्मी परिचालित छन् । एकातिर वर्षायाम सुरु भएको छ, अर्कातिर सुकुम्बासीहरूको धमाधम उठिबास भइरहेको छ ।
उनीहरूका वर्षौंदेखि बसेको घरटहरा गर्ल्यामगुर्लुम ढलेको छ । डोजर चलेको छ । पोकोपुन्तेरो बोकेर हिँड्नु परेको छ । पसिनाले उभ्याएको संरचना ढल्दा कतिपयको आँसु खसेको छ ।

काठमाडौंको थापाथली, गैरीगाउँ, शान्तिनगर, मनोहरा, गोठाटार, बुद्धचोकलगायत सुकुम्बासी बस्ती क्षेत्रमा डोजर चल्दा सरकारी जग्गा अतिक्रमणमा परेका देशका अन्य ठाउँमा पनि डोजर चलेको छ । रुपन्देहीको बुटवलमा उच्च अदालत परिसरमा अतिक्रमण गरिएको जग्गा क्षेत्रमा निर्मित संरचना हटाइएको छ ।

उच्च अदालत तुलसीपुर बुटवल इजलासको अनुरोधमा अतिक्रमणमा परेको उच्च अदालतकै जग्गा उपमहानगरपालिकाले आइतबार बिहान डोजर चलाएको हो।

डोजर चलाउने भएपछि त्यहाँका मानिसहरूले स्वस्फूर्त रूपमा सामानहरू सारेका थिए।

उपमहानगरपालिका स्रोतका अनुसार बुटवल उपमहानगरपालिका–४ जेसिज चोकबाट उत्तरतर्फको सडकमा रहेको पश्चिमतर्फ अतिक्रमणमा साबिकको कित्ता नं। ३९६ को २ बिघा ५ कट्ठा १४ धुर क्षेत्रफलमा रहेका अनधिकृत घर टहरा हटाउन थालिएको हो।

उक्त क्षेत्रमा निर्माण गरिएका घर टहरा हटाउन उच्च अदालत तुलसीपुर बुटवल इजलासको कार्यालयको भौतिक व्यवस्थापन समितिको वैशाख ९ गते बसेको प्रमुख जिल्ला अधिकारीसहितको बैठकले बुटवल उपमहानगरपालिकालाई अनुरोध गर्ने निर्णय गरेको थियो।

यस्तै, पर्साको गण्डक नहर छेउमा रहेको गुठीको ५ बिघा जग्गामा रहेका संरचना डोजर चलाएर भत्काइएको छ ।

मधेशका गृह संचार तथा कानुनमन्त्री फकिरा महतोको पहलमा बिहानैदेखि ७ वटा डोजर लगाएर अतिक्रमित जग्गा खाली गराउने काम भइरहेको पालिका अध्यक्ष जयवस्न तयादवले जानकारी दिए ।
त्यहाँ ३८० घर थियो ।