उदयपुर । सुनकोशी नदीमा माछा मार्ने क्रममा बेपत्ता भएका लिम्चुङबुङ गाउँपालिका-४ जाँतेका ५१ वर्षीय शमशेर राई पाँच दिनपछि मृत अवस्थामा फेला परेका छन्।

जिल्ला प्रहरी कार्यालयका अनुसार गत मङ्गलबार गाउँका साथीहरूसँग माछा मार्न गएका राई दिउँसो करिब ३ बजे सुनकोशी नदीमा बेपत्ता भएका थिए। त्यसपछि स्थानीयवासी र प्रहरीको संयुक्त खोजी अभियान जारी थियो।

खोजीका क्रममा शनिबार साँझ राईको शव रौतामाई गाउँपालिका-भदौरेस्थित सुनकोशी किनारमा फेला परेको जिल्ला प्रहरी कार्यालयका प्रमुख राजन चापागाईंले जानकारी दिए।

घटनास्थल जिल्ला प्रहरी कार्यालयदेखि करिब १८ कोष उत्तर–पूर्वी पहाडी क्षेत्रमा पर्छ। प्रहरीले आवश्यक कानुनी प्रक्रिया पूरा गर्दै घटनाबारे थप अनुसन्धान भइरहेको जनाएको छ।