काठमाडौँ । प्रधानमन्त्री बालेन्द्र शाह (बालेन) को भारत भ्रमणको तयारी तीव्र बनेको छ। नेपाल र भारत दुवै पक्षले भ्रमणलाई लक्षित गर्दै कूटनीतिक तयारी अघि बढाएका छन्।

यसै क्रममा भारतका विदेश सचिव विक्रम मिस्री वैशाख २८ गते नेपाल आउने भएका छन्। दुई दिने नेपाल भ्रमणका क्रममा उनले प्रधानमन्त्री बालेनलाई भारत भ्रमणका लागि औपचारिक निमन्त्रणा दिने कार्यक्रम रहेको छ। भारतीय प्रधानमन्त्री नरेन्द्र मोदीको तर्फबाट निमन्त्रणापत्र हस्तान्तरण गर्ने तयारी गरिएको छ।

यसअघि नै प्रधानमन्त्री मोदीले बालेनलाई पदभार ग्रहण गरेबापत बधाई दिँदै भारत भ्रमणको निमन्त्रणा दिएका थिए। उक्त निमन्त्रणालाई प्रधानमन्त्री बालेनले स्वीकार गरेको परराष्ट्रमन्त्री शिशिर खनालले सार्वजनिक गरिसकेका छन्। मन्त्री खनालले भारतका विदेशमन्त्री एस. जयशंकरसँगको भेटपछि प्रधानमन्त्री बालेनको भारत भ्रमण हुने संकेत गरेका थिए।

त्यसैगरी भारतका लागि नेपाली राजदूत डा. शंकर शर्माले पनि प्रधानमन्त्री बालेनको भारत भ्रमण हुने पुष्टि गरेका थिए। अब औपचारिक प्रक्रियाका लागि भारतीय विदेश सचिव मिस्रीको नेपाल भ्रमण तय भएको हो।

मिस्रीले प्रधानमन्त्री बालेनसँग प्रत्यक्ष भेट गरी निमन्त्रणा दिने वा परराष्ट्र मन्त्रालयमार्फत हस्तान्तरण गर्ने भन्ने विषय अझै टुंगिन बाँकी छ। भ्रमणका क्रममा उनले परराष्ट्र सचिव अमृतबहादुर राई, परराष्ट्रमन्त्री शिशिर खनाल, अर्थमन्त्री स्वर्णिम वाग्ले लगायत केही उच्च पदस्थ अधिकारीसँग पनि भेट गर्ने कार्यक्रम छ।

दुई दिनको भ्रमणका क्रममा नेपाल–भारत सम्बन्ध, द्विपक्षीय सहकार्य र विभिन्न सम्झौताहरूको कार्यान्वयन प्रगति समीक्षा हुने बताइएको छ। त्यसका लागि परराष्ट्र मन्त्रालयको दक्षिण एसिया महाशाखाले तयारी अघि बढाइरहेको छ।

मिस्रीको भ्रमणपछि परराष्ट्रमन्त्री खनाल भारत भ्रमणमा जाने तयारी रहेको छ। उनको भ्रमणको मिति मिस्रीको नेपाल भ्रमणपछि टुंगो लाग्ने स्रोतले जनाएको छ।