काठमाडौं । कला, फिल्म तथा साहित्य क्षेत्रमा अभिव्यक्ति स्वतन्त्रता संरक्षणको माग राख्दै कलाकार तथा सिर्जनशील समुदायले आज शान्तिपूर्ण विरोध कार्यक्रम सम्पन्न गरेका छन्।

विभिन्न पेशागत संघ-संगठनमा आबद्ध कलाकार, लेखक, निर्देशक, समालोचक र विद्यार्थीहरू सहभागी रहेको उक्त प्रदर्शनमा अभिव्यक्ति र सिर्जनात्मक स्वतन्त्रतामाथि बढ्दो अंकुशबारे चिन्ता व्यक्त गरियो। सहभागीहरूले ‘सृजनामाथि नियन्त्रण फिर्ता गर’, ‘कला स्वतन्त्रता हाम्रो पहिचान हो’ जस्ता प्लेकार्ड बोकेर विरोध प्रदर्शन गरेका थिए।

विरोधमा सहभागी कलाकारहरूले सृजनात्मक क्षेत्रमा सेन्सर, प्रतिबन्ध र दबाबका कारण स्वतन्त्र अभिव्यक्ति खुम्चिएको बताउँदै सरकारले संवैधानिक अधिकारको पूर्ण सुनिश्चितता गर्नुपर्ने माग गरे। साथै, कलाकारहरूले सिर्जना, विचार र अभिव्यक्तिलाई लोकतान्त्रिक समाजको आधार भएको बताए।