काठमाडौं। अमेरिकाले चाँडै राष्ट्रपति डोनाल्ड ट्रम्पको तस्वीर रहने नयाँ डिजाइनका पासपोर्ट जारी गर्न सुरु गर्ने भएको छ। अमेरिकी विदेश मन्त्रालयका एक अधिकारीले मंगलबार दिएको जानकारीलाई सीएनएनले सार्वजनिक गरेको हो।

अधिकारीका अनुसार वासिङ्टन पासपोर्ट एजेन्सीमार्फत प्रत्यक्ष रूपमा पासपोर्ट नवीकरण गर्नेहरूका लागि यो डिजाइনের पासपोर्ट “डिफल्ट” रूपमा उपलब्ध हुनेछ। तर अनलाइन वा अन्य स्थानबाट नवीकरण गर्नेहरूले भने हालकै पासपोर्ट डिजाइन नै पाउनेछन्।

ट्रम्पको छवि अमेरिकी स्वतन्त्रताको २५०औँ वार्षिकोत्सवका अवसरमा प्रयोग गरिएको हो, जसलाई यस विशेष समारोहसँग जोडिएको सबैभन्दा महत्त्वपूर्ण प्रतीकको रूपमा हेरिएको छ। नयाँ पासपोर्टमा ट्रम्पको अनुहार र हस्ताक्षर भित्री आवरणमा सुनौलो अक्षरमा छापिनेछ।

विदेश मन्त्रालयका प्रवक्ता टोमी पिगटले भने, ‘अमेरिकाले जुलाईमा २५०औँ वार्षिकोत्सव मनाउँदैछ। यस ऐतिहासिक अवसरलाई सम्झन सीमित संख्यामा विशेष डिजाइनका पासपोर्ट जारी गर्न तयारी भइरहेको छ।’ उनका अनुसार यी पासपोर्टमा उन्नत कलात्मक डिजाइन र उच्च गुणस्तरका तस्बिर रहनेछन्, तर अमेरिकी पासपोर्टका सुरक्षात्मक विशेषताहरू भने अपरिवर्तित रहनेछन्।

नयाँ डिजाइनका पासपोर्ट गर्मीयामदेखि नै वितरण सुरु हुने मन्त्रालयले जनाएको छ। तर कति संख्यामा पासपोर्ट जारी गरिने भन्ने जानकारी खुलाइएको छैन।

नमुना डिजाइनअनुसार नयाँ पासपोर्टको पछाडिल्लो आवरणमा जोन ट्रम्बुलको सुप्रसिद्ध चित्र डिक्लेरेसन अफ इन्डिपेन्डेन्सबाट दृश्य समावेश हुनेछ।

हाल प्रयोगमा रहेको अमेरिकी पासपोर्टमा पर्सी मोरानद्वारा बनाइएको फ्रान्सिस स्कटकीको चित्र छ, जसमा फोर्ट म्याकहेनरी माथि भएको गोलाबारीपछि देखिएको बिहानको दृश्य चित्रित गरिएको छ। यही युद्धबाट प्रेरित भई स्कटकीले अमेरिकी राष्ट्रिय गान लेखेका थिए, जसका केही पंक्ति पासपोर्टमा छापिएका छन्।