काठमाडौं।  नेपाल मेडिकल काउन्सिलले विभिन्न देशको नागरिकता लिएर नेपाली नागरिकता त्यागेका १९ जना चिकित्सकको दर्ता (लाइसेन्स) खारेज गरेको छ।

काउन्सिलका अनुसार अमेरिका देखि बेलायतसम्मका सात देशका राहदानी लिएका नेपालीमूलका चिकित्सकहरूको नाम दर्ता किताबबाट हटाइएको हो। काउन्सिलका रजिस्ट्रार डा. सतिश देवका अनुसार यो निर्णय प्रचलित ऐन तथा नियमावली कार्यान्वयनको क्रममा गरिएको हो।

काउन्सिलले नेपाल मेडिकल काउन्सिल ऐन २०२०, नेपाल मेडिकल काउन्सिल नियमावली २०२४ र नेपाली नागरिकता ऐन २०६३ अनुसार नेपाली नागरिकता परित्याग गरी विदेशी नागरिकता लिएका चिकित्सकहरूको लाइसेन्स खारेज गरिएको जनाएको छ।

विवरणअनुसार बेलायतको नागरिकता लिएका ७ जना, अमेरिकाका ५ जना, क्यानडा र न्युजिल्याण्डका २-२ जना तथा जर्मनी, भारत र अष्ट्रेलियाका १-१ जना चिकित्सकको दर्ता खारेज गरिएको हो।

काउन्सिलले यसलाई औपचारिक निर्णय कार्यान्वयनको प्रक्रिया भएको स्पष्ट पार्दै सम्बन्धित चिकित्सकहरूको नाम सार्वजनिक गर्ने सूचना मात्र प्रकाशित गरिएको जनाएको छ।