काठमाडौं। साहित्यकार तथा पत्रकार श्याम रिमालको नयाँ कवितासङ्ग्रह ‘लाभा’ सार्वजनिक गरिएको छ।

भदौ महिनामा भएको जेनजी आन्दोलनलाई मुख्य आधार बनाइ लेखिएको कृतिमा आन्दोलनका भाव, सामाजिक परिवेश र नयाँ पुस्ताको आकांक्षालाई कवितामार्फत प्रस्तुत गरिएको लेखकले बताए।

विश्वभरका स्वप्नील, सिर्जनशील र साहसी युवापुस्तालाई समर्पित यो कृति रिमालकी ९२ वर्षीया आमा चेतकुमारी रिमालले प्रकाशन गरेकी हुन्।

कृतिमा २३ कविता र पुस्तक आवरणमा समावेश गरिएको एकसहित जम्मा २४ कविता छन्, जसले भदौ २३ र २४ का घटनालाई रूपकमार्फत संकेत गर्छन्।

गीत, मुक्तक, हाइकु, कथा र धारावाहिक उपन्याससहित विभिन्न विधामा सक्रिय रिमालका प्रकाशित कृतिहरूले उनलाई स्थापित साहित्यकारका रूपमा चिनाएका छन्।

‘लाभा’लाई उनको पछिल्लो रचनात्मक यात्राको नयाँ विस्तारका रूपमा हेरिएको छ।