काठमाडौं। काठमाडौंको शंखमुलमा रहेको अव्यवस्थित तथा सुकुम्बासी बस्तीमा डोजर चलाइएको छ। सरकारले दोस्रो चरणअन्तर्गत काठमाडौं उपत्यकाका बागमती तथा सहायक नदी किनारमा रहेका सुकुम्बासी बस्ती हटाउने अभियानलाई तीव्रता दिएको हो।

शुक्रबार बल्खु, माछापोखरीलगायत क्षेत्रमा पनि डोजर परिचालन गरिएको छ।

जिल्ला प्रशासन कार्यालय काठमाडौंले सूचना जारी गर्दै बस्ती खाली गर्न बिहीबार साँझसम्मको समयसीमा दिएको थियो। प्रशासनको सूचनापछि प्रभावित क्षेत्रका बासिन्दाहरूले आफैं सामान सार्ने काम गरेका थिए।

दोस्रो चरणअन्तर्गत आजदेखि टेकुको वंशीघाट, शंखमूल, बुद्धनगर, बल्खु, कुलेश्वर, कपन, वसुन्धारा, गोंगबु, बालाजु र माछापोखरीलगायत क्षेत्रमा अतिक्रमित जग्गा खाली गर्ने तयारी गरिएको छ।

यसअघि पहिलो चरणमा सिनामंगलको गैरीगाउँ, शान्तिनगर, मनोहरा र थापाथली क्षेत्रका बस्ती खाली गरिसकिएको थियो।