हेटौँडा। बागमती प्रदेश सरकारले उपसचिवसहित १८ जना कर्मचारीको सरुवा गरेको छ। आर्थिक वर्षको अन्तिम समयमा विभिन्न मन्त्रालय, निर्देशनालय तथा मातहतका कार्यालयहरूमा कार्यरत कर्मचारीहरूको जिम्मेवारी हेरफेर गरिएको हो।

प्रमुख सचिव बाबुराम अधिकारीको निर्णयअनुसार मुख्यमन्त्री तथा मन्त्रिपरिषद्को कार्यालय हेटौँडाले नवौँ तह (उपसचिव)देखि पाँचौँ तहसम्मका अधिकृत तथा सहायकस्तरका कर्मचारीहरूको सरुवा गरेको छ।

कार्यालयका अनुसार तीन जना उपसचिव, आठौँ तहका चार जना, सातौँ तहका एक जना, छैटौँ तहका नौ जना र पाँचौँ तहका एक जना कर्मचारीको सरुवा गरिएको छ।

निर्णयअनुसार प्रदेश नीति तथा योजना आयोगकी उपसचिव प्रतिभा पन्थीलाई प्रदेश सुशासन केन्द्र, जावलाखेलमा सरुवा गरिएको छ भने उपसचिव अनिता तामाङलाई प्रदेश सुशासन केन्द्रबाट सहकारी तथा गरिबी निवारण मन्त्रालय, हेटौँडामा जिम्मेवारी दिइएको छ। सहकारी तथा गरिबी निवारण मन्त्रालयका उपसचिव प्रदीपराज पौडेललाई प्रदेश सरकारी रजिस्ट्रारको कार्यालय, काठमाडौँमा सरुवा गरिएको छ।

त्यस्तै, अधिकृतस्तर आठौँमा कार्यरत अम्बिका घिमिरेलाई संस्कृति तथा पर्यटन मन्त्रालय, हेटौँडामा सरुवा गरिएको छ भने सरुपा पाण्डेलाई पर्यटन कार्यालय, काठमाडौँबाट प्रदेश सुशासन केन्द्र, ललितपुरमा पठाइएको छ। सन्ध्या लामिछानेलाई मुख्यमन्त्री तथा मन्त्रिपरिषद्को कार्यालयबाट प्रदेश सुशासन केन्द्र, ललितपुरमा सरुवा गरिएको छ।

लेखनाथ खतिवडालाई उद्योग, वाणिज्य, भूमि तथा प्रशासन मन्त्रालय हेटौँडाबाट श्रम, रोजगार तथा यातायात मन्त्रालयमा सरुवा गरिएको छ।

सातौँ तहका शिव प्रसाद भट्टराईलाई यातायात व्यवस्था कार्यालय, भक्तपुरबाट उद्योग, वाणिज्य, भूमि तथा प्रशासन मन्त्रालय हेटौँडामा सरुवा गरिएको छ।

छैटौँ तहका श्रीधर पुडासैनी, किशोर जोशी र पुरुषोत्तम मिश्रसहित विभिन्न कर्मचारीलाई प्रदेश लोक सेवा आयोग तथा मन्त्रालयहरूमा जिम्मेवारी तोकिएको छ।

यस्तै, अन्य छैटौँ तहका कर्मचारीहरूलाई स्वास्थ्य, वन तथा वातावरण, खानेपानी, ऊर्जा तथा सिँचाइ लगायतका मन्त्रालय तथा कार्यालयहरूमा सरुवा गरिएको छ।

कम्प्युटर अपरेटर दीपेश खनाललाई पनि यातायात व्यवस्था कार्यालय चितवनबाट खानेपानी, ऊर्जा तथा सिँचाइ मन्त्रालयमा सरुवा गरिएको छ।