काठमाडौँ।  बन्द अवस्थामा रहेको ‘जयनेपाल’ हल शुक्रबारदेखि पुनः सञ्चालनमा आएको छ। शुक्रबार बिहान आयोजित एक कार्यक्रमका बीच हलको औपचारिक सुरुवात गरिएको हो। कार्यक्रममा नीर शाह, रवीन्द्र खड्का लगायतका चलचित्रकर्मीहरूको उपस्थिति रहेको थियो।

सञ्चालकका अनुसार सुरुमा नेपाली फिल्म ‘लालीबजार’ प्रदर्शन गरेर हल सञ्चालन गर्ने योजना भए पनि उक्त फिल्म रोकिएपछि ‘राजा शिवाजी’ प्रदर्शन गर्दै हल पुनः सञ्चालनमा ल्याइएको हो। सञ्चालकमध्येका एक गोपाल कायस्थले सो जानकारी दिएका छन्।

यसअघि क्यूएफएक्सको माउ कम्पनी क्वेस्ट इन्टरटेनमेन्टले सञ्चालन गर्दै आएको यो हल केही समय बन्द भएपछि हाल बज इन्टरटेनमेन्टले यसको सञ्चालन जिम्मा लिएको हो।

हलमा कुल ३०६ सिट क्षमता रहेको छ। टिकट दर अनुसार सुतेर हेर्ने सिटका लागि ८०० रुपैयाँ, बाल्कोनीका लागि ५०० रुपैयाँ र सामान्य सिटका लागि ३५० रुपैयाँ शुल्क निर्धारण गरिएको छ।