काठमाडौं। अमेरिकी राष्ट्रपति डोनाल्ड ट्रम्पले इरानलाई कुनै पनि अवस्थामा परमाणु हतियार विकास गर्न नदिने स्पष्ट चेतावनी दिएका छन्। उनले परमाणु हतियार विश्व सुरक्षाका लागि ठूलो खतरा भएको भन्दै अमेरिकाले इरानविरुद्ध कडा कदम चाल्न बाध्य भएको दाबी गरे।

शुक्रबार फ्लोरिडामा आयोजित एक कार्यक्रममा बोल्दै ट्रम्पले भने, “यदि हामीले यो कदम नचालेको भए इरानसँग अहिले परमाणु हतियार हुन्थ्यो र त्यसले इजरायल, मध्यपूर्व तथा युरोपलाई विनाशतर्फ धकेल्थ्यो। यस्ता पागल मानिसहरूको हातमा परमाणु हतियार जान वा दिन सकिँदैन।”

उनले अमेरिकाले मध्यपूर्वलाई सम्भावित ‘परमाणु संकट’ बाट जोगाएको पनि दाबी गरे। साथै, उनले इरानबाट आएको पछिल्लो शान्ति प्रस्ताव आफूले पुनः अस्वीकार गरेको जानकारी दिए। यसअघि पनि इरानले अप्रिल २६ र २७ मा वार्ता प्रस्ताव पठाएको थियो, तर ट्रम्पले त्यसलाई अस्वीकार गरेका थिए। ह्वाइट हाउसका एक अधिकारीका अनुसार इरानको पछिल्लो प्रस्तावमा परमाणु कार्यक्रमबारे स्पष्ट उल्लेख नभएकाले ट्रम्प असन्तुष्ट बनेका हुन्।

यता, इरानले भने ‘स्ट्रेट अफ हर्मुज’ तत्काल खोलिनुपर्ने र परमाणु मुद्दामा पछि वार्ता गर्न सकिने अडान लिएको छ। तर ट्रम्प दुवै विषय एकैसाथ सम्बोधन हुनुपर्ने पक्षमा छन्। उनले यसअघि नै वार्तामा बस्नुअघि इरानले समृद्ध युरेनियम बुझाउनुपर्ने शर्त राखेका थिए।