काठमाडौं। चीनका लागि नेपालका सात पूर्वराजदूतहरूले लिम्पियाधुरा क्षेत्रबारे सरकारले हालै जारी गरेको वक्तव्यको समर्थन गर्दै सराहना गरेका छन्।

सोमबार जारी संयुक्त वक्तव्यमा उनीहरूले लिम्पियाधुरा नेपालको अभिन्न भू-भाग भएको स्पष्ट गर्दै मित्र राष्ट्र चीन र भारत दुवै नेपालप्रति सार्वभौमिक सम्मानका साथ संवेदनशील रहने विश्वास व्यक्त गरेका छन्। पूर्वराजदूतहरूले सरकारको हालैको कूटनीतिक अभिव्यक्तिलाई सकारात्मक र आवश्यक कदमको रूपमा मूल्यांकन गरेका हुन्।

संयुक्त वक्तव्य जारी गर्नेमा पूर्वराजदूतहरू राजेश्वर आचार्य, महेन्द्र पाण्डे, टङ्क कार्की, महेश मास्के, लीलामणि पौडेल, विष्णुपुकार श्रेष्ठ र कृष्णप्रसाद ओली रहेका छन्। उनीहरूले नेपाल-चीन दौत्य सम्बन्ध ७० वर्ष पुगेको अवसरमा यो धारणा सार्वजनिक गरेका हुन्।

वक्तव्यमा नेपालले लामो समयदेखि अवलम्बन गर्दै आएको ‘एक चीन नीति’ प्रति आफ्नो दृढ प्रतिबद्धता पुनः स्मरण गरिएको छ। साथै, नेपालको भूमि कुनै पनि मित्र राष्ट्रविरुद्ध प्रयोग हुन नदिने अडानलाई निरन्तरता दिनुपर्नेमा जोड दिइएको छ।

पूर्वराजदूतहरूले वर्तमान भू-राजनीतिक परिस्थितिमा नेपालले आफ्नो सीमा सुरक्षा र सार्वभौमिकताको रक्षा गर्न तत्काल र प्रभावकारी कूटनीतिक पहल अघि बढाउनुपर्ने आवश्यकता औँल्याएका छन्।

त्यस्तै, नेपाल–चीनबीचका बीआरआईलगायत आर्थिक, सांस्कृतिक, शैक्षिक तथा विकास साझेदारीका परियोजनाहरूलाई शीघ्र कार्यान्वयनमा लैजानुपर्ने सुझाव पनि उनीहरूले दिएका छन्।

पूर्वराजदूत महेश मास्केका अनुसार बैठकमा सहभागी सबैले यी परियोजनाहरूलाई प्रभावकारी रूपमा अघि बढाउन नेपालले सक्रिय भूमिका खेल्नुपर्नेमा एकमत व्यक्त गरेका थिए।

पूर्वराजदूतहरूको यो सामूहिक धारणा नेपाल-चीन सम्बन्धलाई अझ सुदृढ बनाउन कूटनीतिक पहल आवश्यक रहेको सन्देशका रूपमा लिइएको छ।