काठमाडौं। श्रम संस्कृति पार्टीका अध्यक्ष तथा सांसद हर्क साम्पाङले नक्कली सुकुम्वासीको पहिचान गरी कडा कारबाही गर्न सरकारसँग माग गरेका छन्।

सोमबार थापाथलीस्थित सरकारले भत्काएको सुकुम्वासी बस्तीमा पुगेर साम्पाङले नक्कली सुकुम्वासीका कारण वास्तविक भूमिहीन तथा सुकुम्वासीहरू समस्यामा परेको भन्दै यस्तो माग गरेका हुन्।

उनका अनुसार केही व्यक्तिहरूले सुकुम्वासीको नाममा सरकारी जग्गा कब्जा गर्ने मात्र होइन। भाडामा लगाएर आर्थिक लाभ समेत लिइरहेको देखिएको छ। यस्ता गतिविधिमा संलग्नलाई छानबिन गरी कानुनी दायरामा ल्याउनुपर्ने उनको भनाइ छ।

साम्पाङले बस्ती हटाउनुअघि वास्तविक सुकुम्वासीको स्पष्ट पहिचान नगरी एक्कासि डोजर चलाउँदा वास्तविक पीडित थप संकटमा परेको टिप्पणी गरे। ‘गरिब जनतालाई विस्थापित गर्नु समाधान होइन।’,उनले भने, ‘उनीहरूको जीवन सुरक्षित हुने गरी सरकारले दीर्घकालीन व्यवस्थापन गर्नुपर्छ।’

उनले सरकारलाई नागरिकको अधिकारलाई प्राथमिकतामा राख्दै आगामी दिनमा थप संवेदनशील र व्यवस्थित कदम चाल्न पनि सुझाव दिएका छन्।

साम्पाङले वास्तविक भूमिहीनको पहिचान, पुनःस्थापना र सामाजिक सुरक्षाको सुनिश्चितता राज्यको जिम्मेवारी भएको उल्लेख गर्दै यस विषयमा तत्काल सुधार आवश्यक रहेको बताए।