काठमाडौं। वैशाख ११ देखि प्रदर्शनमा आएको फिल्म ‘परालको आगो’ ले बक्स अफिसमा उल्लेखनीय सफलता हात पारेको छ। प्रारम्भिक १० दिनमै फिल्मले ३ करोड १२ लाख ग्रस कमाइ गरेको चलचित्र विकास बोर्डले जनाएको छ। सो अवधिमा फिल्मका लागि १ लाख १० हजारभन्दा बढी टिकट बिक्री भएको छ।

लक्ष्मण सुनार निर्देशित यस फिल्ममा सौगात मल्ल, प्रकाश सपुत र सुहाना थापा शीर्ष भूमिकामा देखिएका छन्।

यसैबीच, चैत २७ देखि प्रदर्शनमा रहेको फिल्म ‘राम नाम सत्य’ ले वैशाख २० सम्म ३ करोड ३९ लाख ग्रस कमाइ गरेको छ। ‘परालको आगो’भन्दा दुई साताअघि प्रदर्शनमा आए पनि यसको कुल कलेक्सन २७ लाखले मात्र बढी देखिएको छ।

माइकल चन्द निर्देशित ‘राम नाम सत्य’ एक एक्सन जनराको फिल्म हो, जसमा विराज भट्ट, सुशील श्रेष्ठ, सुपुष्पा भट्ट र दिव्या रायमाझी मुख्य भूमिकामा छन्।