काठमाडौँ । श्रम संस्कृति पार्टीका अध्यक्ष हर्क साम्पाङले प्रलोपा नेता सुदन किराँतीसँग गर्ने भनेको एकता भङ्ग गरेका छन्। 

साम्पाङ र प्रगतिशील लोकतान्त्रिक पार्टी (प्रलोपा) छोडेका नेता किराँती भनिएको एकता प्रक्रिया अन्तिम चरणमै आएर रोकिएको हो । समायोजनका सबै खाका तयार भइसकेको अवस्थामा श्रम संकृतिका अध्यक्षले एकतर्फी रूपमा सहमति भंग गरेपछि किराँती अलग राजनीतिक अभियानका लागि निकटवर्तीसँग गम्भीर छलफलमा जुटेका छन्।

दुवैबीच २१ फागुनमा, चुनावअघि नै सहकार्य भएको थियो। २०७९ को चुनावमा भोजपुरबाट प्रतिनिधिसभा सदस्य बनेका किराँती प्रचण्ड नेतृत्वको सरकारमा संस्कृति, पर्यटन तथा नागरिक उड्डयनमन्त्री बनेका थिए। राई धरान मेयर हुँदा विमानस्थल विषयमा केही विवाद भए पनि चुनावको मुखमा उनीहरूबीच एकअर्कालाई सहयोग गर्ने समझदारी बनेको थियो।

प्रलोपाबाट राजीनामा दिएपछि किराँती राई एकता प्रक्रिया तीव्र बन्यो । करिब दुई महिनाअघि दुवै पक्षले तीन तीन सदस्यीय वार्ता टोली पनि गठन गरे । वार्ताबाट किराँतीलाई श्रम संस्कृतिको वरिष्ठ उपाध्यक्ष, दुई उपमहासचिव, एक सचिव र १५ केन्द्रीय सदस्य दिने सहमति बनिसकेको थियो। सहमतिमा कलाकार दयाहाङ राई र गायक राजेशपायल राई साक्षी बसेका थिए।

तर सहमति सार्वजनिक हुन नपाउँदै राईले वार्ता टोली भंग गर्दै संयोजकलाई उपाध्यक्षमा मनोनयन गरे, जसलाई किराँती पक्षले सहमतिको खुला उल्लङ्घन मानेको छ।

वार्ता टोली गठन गर्नुअघि दुवै नेताबीच विधान संशोधन, पार्टी व्यवस्थापन, केन्द्रले नीति बनाएर मातहत समितिमा हस्तक्षेप नगर्ने जस्ता स्पष्ट सहमतिहरू बनेका थिए। तर वार्ता टोली भंग भएपछि हर्क पक्षसँग दूरी बढेको र एकता अब ठप्प भएको नेताहरूले बताएका छन्।