काठमाडौँ । गायक रामकृष्ण ढकाल एक अभिव्यक्तिले सामाजिक विवादमा तानिएका छन्। एक अन्तर्वार्तामा उनले जेनजी आन्दोलनको क्रममा सहकारी ठगी आरोपमा नख्खु जेलमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई आफ्नै गाडीमा चढाएर अस्पतालतर्फ लगेको थिए भन्ने खुलासा गरेपछि विवाद चुलिएको हो।

‘मालती मङ्गले’ फिल्म आगामी २५ गतेबाट प्रदर्शनमा आउँदैछ, र यही प्रमोसनका क्रममा ढकालले उक्त घटनाबारे खुलेर बताएका हुन्। कार्यक्रम प्रस्तोताले नख्खु कारागार तोडफोडको दिन, भदौ २४ गतेको भिडियो देखाएपछि ढकालले त्यही निलो गाडी आफैले चलाइरहेको बताएका थिए।

ढकालका अनुसार उनी भैंसीपाटीमा बस्ने भएकाले त्यस दिन जेनजी आन्दोलनतर्फ जाँदै गर्दा नख्खु जेल नजिक पुगेका थिए। त्यहाँ बाहिरको रेस्टुरेन्ट नजिक रवि लामिछाने हात हल्लाउँदै देखिएको, र “पुर्‍याइदिन्छु” भन्ने भावना राखेर उनले आफूले नै गाडी चलाएर साथ दिएको बताए।

त्यही बेला ढकालको गाडीले रविलाई लगेको हल्ला त चलेको थियो, तर ड्राइभर को थे भन्ने खुलासा कहिल्यै भएको थिएन। भिडियोमा अनुहार नदेखिएकाले त्यो रहस्यकै रूपमा थियो। अहिले भने ढकालले स्वयं आफू गाडी चलाएको स्वीकारेपछि विषय फेरि चर्चामा आएको छ।

यो खुलासा बाहिरिएपछि सामाजिक सञ्जालमा ढकालविरुद्ध तीव्र प्रतिक्रिया देखिएको छ। केही प्रयोगकर्ताले २५ गते प्रदर्शनमा आउने ‘मालती मङ्गले’ फिल्म बहिस्कार गर्ने चेतावनी समेत दिएका छन्।