काठमाडौं । नेपाली कांग्रेसकी सांसद गीता गुरुङले काठमाडौं उपत्यकाका विभिन्न स्थानबाट विस्थापित गरिएका सुकुम्बासीहरूको अवस्थाप्रति गम्भीर चिन्ता व्यक्त गर्दै सरकारसँग तत्काल व्यवस्थापन गर्न माग गरेकी छन्।

भक्तपुरस्थित नेपाल विद्युत प्राधिकरणको कार्यालयमा राखिएका विस्थापितहरूलाई बुधबार भेटेपछि उनले वृद्धवृद्धा, महिला, बालबालिका र बिरामीहरू अत्यन्त कष्टकर अवस्थामा बस्न बाध्य रहेको बताइन् ।

‘त्यहाँ पुग्दा वृद्ध आमाबुबा, दाजुभाइ, दिदीबहिनी र विशेषगरी बालबालिकाहरूको आँखामा जुन मनोवैज्ञानिक त्रास देखेँ, त्यसले मलाई भित्रैसम्म हल्लाएको छ। उहाँहरूकाे पीडा सुन्दा मात्रै त मन असाध्यै भारी भइरहेकाे छ भने पीडा भाेगिरहनुभएका उहाँहरूलाई कस्तो भइरहेकाे होला ?’उनले भनिन् ।

बालबालिकाहरू शिक्षाबाट वञ्चित भएको उल्लेख गर्दै ‘कहिलेबाट स्कुल जान पाइएला?’  भन्ने चिन्ता उनीहरूमा स्पष्ट देखिएको बताइन्। वृद्ध तथा बिरामीहरूले आवश्यक औषधि र उपचार नपाएको गुनासो गरेको पनि उनले जानकारी दिइन्।

सांसद गुरुङका अनुसार स्वास्थ्य, शिक्षा र आधारभूत व्यवस्थापनको अभावमा विस्थापितहरूको जीवन झन् कष्टकर बन्दै गएको छ।

‘सरकारले उचित प्रबन्ध बिनानै चलाएकाे डाेजर अभियानकाे त्रासदीबाट उहाँहरू अझै मुक्त भइसक्नुभएकाे छैन । सरकारले उहाँहरूलाई अझै आश्वस्त पार्न सकिरहेकाे देखिएन’, उनले भनिन्।

उनले विकासका नाममा नागरिकलाई त्रसित बनाउनु लोकतान्त्रिक मूल्यअनुसार उपयुक्त नहुने उल्लेख गर्दै बालबालिकामा परेको मानसिक असरप्रति पनि चिन्ता व्यक्त गरिन्।

‘खेल्ने र पढ्ने उमेरका नानीबाबुहरू डोजरको आवाज र प्रहरीको उपस्थिति देखेर त्रसित छन्,’उनले सोधिन्, ‘उनीहरूको मानसपटलमा परिरहेको यो नकारात्मक असरको क्षतिपूर्ति कसले गर्ने ?’

उनले विस्थापितहरूका लागि सुरक्षित आवासको ग्यारेन्टी गर्न, स्वास्थ्य सेवा उपलब्ध गराउन र बालबालिका तथा महिलाको सुरक्षामा विशेष ध्यान दिन सरकारसँग जोडदार माग गरेकी छन्।

विस्थापित सुकुम्बासीहरूलाई भेट्न सांसद गुरुङसहित रास्वपा सांसद आशिका तामाङ, राजीव खत्री, एमाले सांसद सुहाङ नेम्बाङलगायत गएका थिए ।