एजेन्सी। तमिल सुपरस्टार तथा राजनीतिज्ञ विजयको राजनीतिक उचाइसँगै उनको आर्थिक हैसियत पनि चर्चामा आएको छ। उनकाे पार्टी तमिलगा वेत्री कझगमले अभूतपूर्व जित हासिल गर्दै सरकार गठनतर्फ अघि बढिरहेको छ।

मार्च २०२६ मा पेश गरिएको निर्वाचन विवरणअनुसार विजयको कुल सम्पत्ति करिब ६२४ करोड भारु रहेको उल्लेख गरिएको छ। यसमध्ये ४०४ करोड भारु चल सम्पत्ति र २२० करोड भारु अचल सम्पत्ति रहेको विवरणमा देखाइएको छ। चलचित्र, विज्ञापन र रियल स्टेट व्यवसायबाट उनले ठूलो आम्दानी गरेको बताइएको छ।

विवरणअनुसार विजयसँग विभिन्न बैंक खातामा ठूलो रकम जम्मा छ। विशेषगरी इन्डियन ओभरसिज बैंकमा मात्रै २१३ करोड भारुभन्दा बढी मौज्दात रहेको उल्लेख छ। यस्तै एक्सिस बैंक, एचडीएफसी बैंक र एसबीआईमा पनि करोडौं रुपैयाँ बराबरका फिक्स्ड डिपोजिट रहेको बताइएको छ। उनले विभिन्न कम्पनीमा लगानी गर्नुका साथै परिवारका सदस्यलाई ऋण तथा अग्रिम रकम दिएको विवरणमा उल्लेख गरिएको छ।

विजयसँग महँगा गाडीहरूको ठूलो संग्रह पनि रहेको छ। उनीसँग बीएमडब्लू ५३०, टोयोटा लेक्सस ३५०, टोयोटा भेलफायर, बीएमडब्लू आई–७, रेन्ज रोभर इभोक, अडी ए–८ एल र फोर्ड मस्टाङजस्ता लक्जरी गाडीहरू छन्।

उनको अचल सम्पत्तिमा कोडाइकनालस्थित कृषि भूमि र चेन्नईका विभिन्न क्षेत्रमा रहेका व्यावसायिक तथा आवासीय भवनहरू समावेश छन्। नीलंकराई, सालिग्रामम, पोरुर, मायलापुर र एग्मोर क्षेत्रमा रहेका सम्पत्तिको मूल्य अर्बौं रुपैयाँ रहेको बताइएको छ।

विजयको सबैभन्दा चर्चित सम्पत्ति नीलंकराईस्थित समुद्र किनारको आलिशान बंगला हो। कासुआरिना ड्राइभमा रहेको उक्त घरको मूल्य करिब ७० देखि ८० करोड भारुसम्म रहेको अनुमान गरिएको छ।

निर्वाचन विवरणअनुसार विजयसँग ८८३ ग्राम सुन तथा चाँदीका गरगहना पनि रहेका छन्, जसको मूल्य १ करोड २० लाख भारुभन्दा बढी रहेको उल्लेख छ। उनले कुनै बैंक ऋण वा दायित्व नरहेको बताएका छन्। आर्थिक वर्ष २०२४–२५ मा मात्रै उनले १८४ करोड ५३ लाख भारु आम्दानी गरेको विवरण सार्वजनिक भएको छ।

विजयले सन् १९९९ मा संगीतासँग विवाह गरेका हुन्। उनका एक छोरा जेसन सञ्जय र एक छोरी दिव्या शाशा छन्।